Шеробод туманида эҳтиёжманд хотин-қизлар, кам таъминланган ва ногиронлиги бор оилалар учун 40 хонадонга мўлжалланган иккита беш қаватли уй фойдаланишга топширилди.
Давлат ва жамоат ташкилотлари вакиллари, нуроний отахон ва онахонлар, ёшлар, янги уйларнинг эгалари иштирок этган тантанали тадбирда инсон қадр-қиммати улуғланаётган мамлакатимизда эҳтиёжманд хотин-қизлар, кам таъминланган оилалар ва ногиронлиги бор юртдошларимизни уй-жой билан таъминлашга алоҳида эътибор қаратилаётгани, ҳудудларда ижтимоий турар-жой бинолари барпо этилаётгани таъкидланди. Бу жараёнда саховатпеша тадбиркорлар ҳам уй-жойга муҳтож, боқувчисини йўқотган хотин-қизлар ва ногиронлиги бор инсонларга меҳр-мурвват кўрсатиб, барча шароитларга эга замонавий турар-жой бинолари қуриб бераётгани ҳақида сўз юритилди.
Шеробод туманидаги Тароқли маҳалласида қад ростлаган иккита кўп қаватли уйни ҳам маҳаллий тадбиркор ўз ҳисобидан бунёд этиб, муборак Рамазон ҳайити куни уй-жойга муҳтож 40 та оилага ҳадя қилди. Замонавий уй қурувчиси барча мўмин-мусулмонлар қалби эзгулик, меҳр-оқибат нурига тўлиб турган саодатли кунда эҳтиёжмандаларга уй туҳфа қилган тадбиркор номини очиқламасликни сўради. Аслида бу ҳислат ҳам азалий қадриятлари улуғ ва гўзал миллатимизга хос юксак фазилатдир.
–Ота-онамдан эрта ажралиб, момом ва амакиларим қўлида камолга етдим, – дейди Баҳор маҳалласида яшовчи 37 ёшдаги Камола Ҳасанова.– Ёлғиз фарзандман. Талаба бўлганим учун талабалар ётоқхонасида яшаётган эдим. Шундай кенг, ёруғ уйга бепул эгалик қилишни тасаввур ҳам қилолмас эдим. Рамазон ҳайити куни янги уйли бўлганимдан қувончим чексиз. Хонадонда барча маиший жиҳозлар мавжуд. Муқаддас айёмларда биздек кўнгли ўксик инсонлар қалбига қувонч улашаётган давлатимиздан чексиз миннатдормиз. Илоҳим, бизга меҳр-мурувват кўрсатаётган қўли очиқ тадбиркорларимизнинг ишлари янада ривожланиб, топаётган даромадлари янада барокатли, рўзғорлари серфайз, мамлакатимиз осуда, обод бўлаверсин!
Иккита кўп қаватли уйдаги хонадонлар икки ва уч хонали бўлиб, уларнинг ҳар бири юксак дид билан замонавий усулда жиҳозланган. Янги уйнинг соҳибу соҳибалари шундоққина кириб яшашлари учун барча шароит яратилган. Янги кўрпа-тўшаккача муҳайё қилинган.
Тадбирда Сурхондарё вилояти ҳокими У.Қосимов Президентимиз номидан янги уйларнинг соҳибу-соҳибаларига хонадонлар калитларини тантанали топширди.
Саховатпеша тадбиркор ўтган йили ҳам тумандаги 27 та кам таъминланган уй-жойга муҳтож оилага коттеж уй қуриб, ҳадя қилган.
Холмўмин МАМАТРАЙИМОВ,
ЎзА мухбири