Бугун, 13 май куни Руминия пойтахти Бухарест шаҳрида классик шахмат бўйича давом этаётган "Superbet Chess Classic Romania-2025” турнирининг 6-тур баҳслари бўлиб ўтади.

Мазкур турда Абдусатторов қора доналарда франциялик Максим Вашье Лаграв билан куч синашади. Турнир жадвалида 3 очко билан қўшимча кўрсаткичларга кўра, 2-ўринда бораётган Лаграв билан ўтадиган “жанг” айтиш лозим, ҳамюртимиз учун совриндорлар қаторидан жой олиш йўлида муҳим саналади.  

Мусобақада пешқадамлик қилаётган АҚШ вакили Фабиано Каруана ҳамда 3-ўриндан жой олган ҳиндистонлик Рамешбабу Прагнанандха ҳисобида ҳам 3 очкодан мавжуд.  

Турнир жадвалининг 7-8-9-поғоналарида бораётган Нодирбек Абдусатторов, польшалик Ян-Кшиштоф Дуда ва ҳиндистонлик жаҳон чемпиони Доммараджу Гукеш  2 очко билан кифояланган.  

"Superbet Chess Classic Romania-2025”нинг ортда қолган 5 та тур ўйинларининг биронтасида ғалабага эришмаган Нодирбек бугунгача 3 та дуранг, 1 та мағлубият ҳолатида баҳсларни давом эттирмоқда.  

Мукофот жамғармаси 350 минг АҚШ долларидан иборат нуфузли мусобақанинг бугун ўтказиладиган 6-турида Фабиано Каруана бир кун муқаддам ўтган 5-турда Абдусатторов билан дуранг ўйнаган руминиялик Богдан-Даниэл Дикка қарши дона суради.  

9 та турдан иборат халқаро турнирда ғолибликка эришган шахматчи 100 минг, 2-ўринни банд этган иштирокчи 65 минг, 3-ўрин соҳиби 48 минг АҚШ доллари билан, шунингдек баҳсларда қатнашаётган 9 нафар шахматчи эгаллаган қаторидан келиб чиқиб, белгиланган мукофот маблағлари билан тақдирланади.  

Т.Рўзиев, ЎзА