Сунъий интеллект текстиль саноатини ҳам эгалламоқда
Тикув саноати бугун яна бир технологик бурилиш нуқтасига яқинлашди. ХIХ аср бошларида саноат инқилоби даврида пайдо бўлган илк тикув машиналари кийим-кечак ишлаб чиқариш жараёнини тубдан ўзгартирган бўлса, ҳозир бу жараён сунъий интеллект билан янги босқичга кўтарилмоқда. Ўша даврда Элиас Ҳовэ ва Исак Зингер томонидан такомиллаштирилган механик қурилмалар оддий чок тикиш вазифасини бажариб, меҳнат унумдорлигини бир неча баробарга оширган эди. Бугунги кунда эса HIKARI компанияси бу тарихий жараённи рақамли ва ақлли технологиялар билан давом эттирмоқда.
Наманган шаҳрида бўлиб ўтган тақдимот маросими айнан шу янги даврнинг амалий ифодасига айланди. INTECH дилерлик компанияси томонидан ташкил этилган тадбирда HIKARIнинг энг янги инновацион тикув машиналари кенг жамоатчиликка намойиш этилди. Тадбир нафақат йирик ишлаб чиқарувчилар, балки ёш тикувчилар ва тадбиркорлар учун ҳам катта қизиқиш уйғотди.
<iframe width="1396" height="785" src="https://www.youtube.com/embed/GXF-YcnqrW4" title="Sunʼiy intellekt tekstil sanoatini ham egallamoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Тақдимотда компания асосчиси ва бош директори жаноб Wu шахсан иштирок этиб, янги авлод машиналарининг имкониятлари ҳақида батафсил маълумот берди. Унинг таъкидлашича, замонавий тикув ускуналари энди фақат механик қурилма эмас, балки ишлаб чиқариш жараёнини таҳлил қилувчи ва оптималлаштирувчи сунъий интеллект тизимига эга ақлли платформага айланган.
Тадбирда Наманган, Андижон, Фарғона ва бошқа ҳудудлардан келган тикув фабрикалари раҳбарлари, муҳандислар ва тажрибали тикувчилар ҳам иштирок этди. Иштирокчилар янги машиналарнинг иш жараёнини бевосита синаб кўриш имконига эга бўлишди. Айниқса, энергия тежамкорлик ва ишлаб чиқариш самарадорлигини оширувчи технологик ечимлар катта эътибор қозонди.
Андижонлик тадбиркор Исроил Ураемов ҳам янги технологияларга қизиқишини яширмади: «Аввал ҳам HIKARI компаниясидан тикув машиналарини харид қилганмиз. Янги моделларга ҳам қизиқишим ошди. Маҳсулотимиз сифатини яхшилаш ва тикувчиларимиз ишини енгиллаштириш учун сунъий интеллектли моделларни харид қилишни режалаштиряпмиз,» деди у.
Шунингдек, INTECH вакиллик корхонаси раҳбари Муҳаммад Досанов ҳам соҳа истиқболлари ҳақида фикр билдирди. Унинг таъкидлашича, Ўзбекистон текстиль саноати бугун глобал рақобат муҳитида фаол иштирок этмоқда ва замонавий технологияларсиз бу рақобатда устунликни сақлаб қолиш қийин.
Тақдимот жараёнида иштирокчилар ўртасида ўйин ва лотереялар ҳам ўтказилди. Натижада уч нафар омадли иштирокчи HIKARIнинг янги тикув машиналарига эга бўлди. Тадбир якунида эса бир қатор ҳамкорлик шартномалари имзоланди. Бу эса компаниянинг Ўзбекистон бозорига жиддий кириб келаётганини ва маҳаллий ишлаб чиқарувчилар билан узоқ муддатли ҳамкорликни йўлга қўйишга интилаётганини кўрсатади.
Мутахассислар фикрича, сунъий интеллект билан жиҳозланган тикув машиналари нафақат ишлаб чиқариш тезлигини оширади, балки сифат назоратини ҳам янги даражага олиб чиқади. Бу эса Ўзбекистон текстиль саноатининг халқаро бозордаги рақобатбардошлигини янада мустаҳкамлаши мумкин.
Нозимбек Мардонов, Ойбек Давронов, ЎзА
