Стол теннисчиларимиз ”WTT Youth Contender” турнирида 2 та олтин медални қўлга киритди
Пойтахтимиздаги “Олимпия шаҳарчаси” спорт мажмуасида стол тенниси бўйича U11, U13, U15, U17 ва U19 ёш тоифалари ўртасида ўтказилган ”WTT Youth Contender” халқаро мусобақаси мамлакатимизнинг ёш спортчилари учун чинакам маҳорат мактаби вазифасини ўтади.
Бутунжаҳон стол тенниси федерацияси(WTT) тақвимидан ўрин олган мазкур нуфузли мусобақада иштирок этган 21 та давлатнинг 500 нафарга яқин кичик ракетка усталари совринли ўринларга даъвогарлик қилиш билан бир қаторда тегишли рейтинг очколарига эга бўлиш йўлида кураш олиб борди.
Эътиборли жиҳати, Тошкент спорт майдонида кечган уч кунлик баҳсларнинг барча тафсилотлари Бутунжаҳон стол тенниси федерацияси(WTT)нинг ижтимоий тармоқларида, интернет сайтларида кенг ёритиб борилдики, бу орқали халқаро ҳамжамият янги Ўзбекистоннинг спорт ҳаёти билан яқиндан танишди.
Уч кун давомида дунёнинг энг кучли стол теннисчилари билан кечган шиддатли ўйинлар сарҳисобига кўра, Ўзбекистон терма жамоаси аъзоларидан Лочинбек Абдуҳалилов U13 ёш тоифасида, Амир Шириев U11 ёш тоифасида “WTT Youth Contender” ғолиблигини қўлга киритди.
Шунингдек, ўз ёш тоифасида олтин медалга эга чиққан Амир Шириев U13 ёш тоифасида бронза медалга сазовор бўлди.
Шу тариқа Ўзбекистон стол теннисчилари ”WTT Youth Contender” мусобақасини 2 та олтин, 1 та кумуш медаль билан якунлади.
Эртага, 24 июль куни “Олимпия шаҳарчаси”да 18 та давлатнинг 160 нафардан ортиқ профессионал спортчилари иштирокида катталар ўртасида «WTT Feeder» турнири бошланади.
Мусобақалар 28 июлга қадар давом этади.
Т. Рўзиев, ЎзА
