Спорт озуқаси капсулалари ичига яширилган синтетик наркотиклар фош этилди
Тошкент халқаро аэропортида божхона ходимлари синтетик наркотик моддаларни биологик фаол қўшимчалар сифатида олиб киришга уринган қўшни давлат фуқаросини аниқлади.
Маълум қилинишича, “яшил” йўлак орқали ҳаракатланган ушбу шахснинг юклари божхоначилар томонидан текширилганда, спортчилар озуқаси сифатида тақдим этилган 2 қути биологик фаол қўшимча диққатни тортган.
Қадоқ маълумотларига кўра, мазкур қутиларда жами 760 дона оқ рангли капсула бўлиши керак эди. Бироқ текширув жараёнида ҳар иккала қутидаги капсулалар сони 920 донани ташкил этгани аниқланди. Шунингдек, капсулалар оқ рангда эмас, балки сариқ ва қизил рангларда бўлгани улар қўлбола тарзда қадоқланганини кўрсатди.
Божхона қўмитаси Марказий божхона лабораторияси эксперт хулосасига кўра, капсулалар ичига жойланган модда “Альфа-PVP” туридаги синтетик наркотик экани маълум бўлди.
Дастлабки ҳисоб-китобларга кўра, ушбу гиёҳвандлик воситаларининг қора бозордаги чакана қиймати 350 минг АҚШ долларигача етиши мумкин.
Шунингдек, “Тошкент-Аэро” ихтисослаштирилган божхона комплекси тезкор тузилмалари томонидан тадбир давом эттирилиб, йўловчи томонидан “закладка” усулида тарқатиш учун яшириб кетилган яна бир манзил ҳам аниқланди.
Юқори Чирчиқ туманидаги кўздан пана жой белгиланган тартибда холислар иштирокида кўздан кечирилганда, ерга кўмиб қўйилган полиэтилен пакет топилди. Унда бир неча бўлакларга бўлинган, умумий оғирлиги тахминан ярим килограмм бўлган “гашиш” гиёҳвандлик моддаси борлиги аниқланди.
Мазкур ҳолат юзасидан божхона органлари томонидан жиноят иши қўзғатилган бўлиб, тергов ҳаракатлари давом этмоқда.
Ш.Маматуропова,
ЎзА
