Юнус Ражабий номидаги Ўзбек миллий мусиқа санъати институтида атоқли санъаткор, Ўзбекистон халқ артисти Турғун Алиматов ижодига бағишланган “Созлар навоси” номли театрлаштирилган концерт дастури бўлиб ўтди.
Унда “Se-Тоr Тrio” ижодий гуруҳининг мақом санъати дарғаси ижодига доир мусиқий ва саҳнавий дастури юртимиз ва чет эллик мусиқа ихлосмандлари эътиборига ҳавола этилди.
Ўзбекистон халқ артисти Турғун Aлиматов – атоқли ўзбек миллий созандаси ва бастакори эди. Дутор, танбур, сато асбобларини маҳорат билан чалган. Устоз санъаткор дутор, танбур ва сато ижрочилигини мукаммал ўрганиб, ўзига хос ижро услубини яратди. Мусиқашунослар фикрича, соз пардаларини ўта мунгли ва дардли янгратиш, торларни нозик нолалантириб ижро этиш Турғун Aлиматов ижрочилик услубига хос.
Маълумотларга кўра, Турғун Aлиматовнинг мусиқий фаолияти 17 ёшидан умрининг охиригача давом этди. Созанда шашмақом туркумидаги куйларни юксак маҳорат билган чалган, ўзига хос услуб ва мусиқий безаклар билан бойитган.
Санъаткор томонидан юксак маҳорат билан ижро этилган “Дутор навоси”, “Тановар”, “Чоргоҳ”, “Муножот”, “Наврўзи ажам”, “Бузрук”, “Куйгай” каби мумтоз мусиқа намуналари юртимиз ва хорижда катта шуҳрат қозонган.
Т.Aлиматов репертуарида халқ куйлари, мақом ва машҳур ашулаларнинг чолғу йўллари (“Дутор навоси”, “Танавор I—II”, “Танбур навоси”, “Чоргоҳ”, “Муножот”, “Нола”, “Наво”, “Наврўзи ажам”, “Бузрук”, “Эй, сабо”, “Куйгай” ва бошқалар) катта ўрин олган.
Устоз санъаткор халқаро мусиқа анжуманларида, АҚШ, Германия, Франция ва бошқа давлатлардаги концертларда муваффақият билан қатнашган.
“Созлар навоси” номли театрлаштирилган концерт дастурида устоз санъаткорнинг ижоди, фаолияти бетакрор мақом мусиқаси ёрдамида санъат мухлисларига тақдим этилди.
Мусиқий кеча якунида Юнус Ражабий номидаги Ўзбек миллий мусиқа санъати институти ректори Элдор Шермонов иштирокчиларни рағбатлантирди.
Айни пайтда ушбу олий ўқув юртида лондонлик профессор-ўқитувчилар иштирокида бўлиб ўтган ижодий мулоқот давомида ҳам миллий санъатимиз заҳматкашларининг ижоди эътироф этилди.
Н.Усмонова, ЎзА