Солиқ тўловчиларга 10,5 триллион сўмдан ортиқ ҚҚС қайтарилди
Мамлакатимизда қўшилган қиймат солиғини (ҚҚС) қайтариш тизими орқали тадбиркорлик субъектларини қўллаб-қувватлаш ишлари изчил давом этди.
Солиқ қўмитаси маълумотларига кўра, жорий йилнинг январь-июнь ойларида солиқ тўловчиларнинг 6 462 та аризаси кўриб чиқилиб, уларнинг 5 569 таси бўйича 10,5 триллион сўмдан ортиқ ҚҚС маблағлари қайтарилган.
Ушбу кўрсаткич давлат томонидан ҳалол фаолият юритаётган тадбиркорлик субъектларининг айланма маблағларини қўллаб-қувватлаш ва ишлаб чиқариш фаолиятини рағбатлантиришга қаратилган механизмлар самарали ишлаётганини кўрсатади.
Таҳлилларга кўра, қайтарилган ҚҚС маблағларининг асосий қисми ишлаб чиқариш соҳаси ҳиссасига тўғри келган. Мазкур йўналишдаги корхоналарга 7,5 триллион сўм ҚҚС қайтарилган бўлиб, бу барча қайтарилган маблағларнинг катта қисмини ташкил этади. Бу эса мамлакатда саноат ишлаб чиқаришини қўллаб-қувватлаш ва экспортбоп маҳсулотлар ишлаб чиқаришга алоҳида эътибор қаратилаётганидан далолат беради.
ҚҚС энг кўп қайтарилган соҳалар учлигига хизмат кўрсатиш тармоғи ҳам кирди. Ушбу соҳа вакилларига 1,1 триллион сўм маблағ қайтарилган. Шунингдек, транспорт хизмати соҳасида фаолият юритувчи корхоналарга 613 миллиард сўм ҚҚС қайтарилди.
ҚҚСни ўз вақтида қайтариш тадбиркорларнинг айланма маблағларини кўпайтириш, инвестиция лойиҳаларини молиялаштириш ва янги ишлаб чиқариш қувватларини яратиш учун муҳим омил ҳисобланади. Бу эса иқтисодиётда ишбилармонлик муҳитини янада яхшилаш, рақобатбардошликни ошириш ҳамда иқтисодий ўсишни қўллаб-қувватлашга хизмат қилади.
Ш.Маматуропова, ЎзА
