SOCAR Кулеви порти орқали Ўзбекистон дизель ёқилғиси транзитини йўлга қўяди
Озарбайжон Давлат нефть компанияси – SOCAR Грузиянинг Қора денгиздаги Кулеви порти орқали Ўзбекистондан дизель ёнилғисини жаҳон бозорига йўналтириш имкониятини кўриб чиқяпти. Бу ҳақда “SOCAR Trading” компанияси халқаро бизнесни ривожлантириш бўлими бошлиғи Тўғрул Кўчарли маълум қилган.
Таъкидланишича, миллий нефть маҳсулотларини халқаро бозорга транзитини амалга ошириш ва экспорт қилишда Озарбайжоннинг кўп йиллик бизнес шериги ҳисобланган Қозоғистон ва Туркманистондан фарқли ўлароқ, айни йўналишда Тошкент билан ҳамкорлик жорий йил бошланган.
– Аслида, бирга ишлаш учун пойдевор анча олдин – томонлар ўртасида тузилган уч йиллик “Турон” энергетика лойиҳаси доирасида қўйилган, – дея қўшимча қилди Кўчарли. – Фақат ташаббусни ҳаётга жорий қилиш ва фаол амалиёт жараёни шу йил йўлга қўйилди.
С.Раҳимов, ЎзА
