АҚШ Президенти Ҳиндистон Россиядан нефть харид қилаётганига жавобан, ушбу мамлакатдан импорт қилинадиган маҳсулотларга қўшимча 25 фоизлик бож қўйиш бўйича фармон чиқарди. Энди Қўшма Штатларга олиб кириладиган ҳинд маҳсулотларига умумий солиқ миқдори 50 фоизга етади.
Янги тартиб 27 августдан кучга киради. Вашингтон бу чорани РФнинг Украинадаги ҳарбий ҳаракатига жавобан жорий қилмоқда.
Оқ уй баёнотида шундай дейилган:
– РФнинг Украинадаги ҳаракати АҚШ миллий хавфсизлиги ва ташқи сиёсатига таҳдид солмоқда. Хатарни жиловлаш учун қатъий чора талаб қилинмоқда. Ҳиндистон Москвадан нефть харид қилаётгани бизнинг саъй-ҳаракатимизга путур етказмоқда.
Ҳинд диёри Ташқи ишлар вазирлиги бу амалиётни кескин қоралаб, божни “ноҳақ, асоссиз ва адолатсиз” деб атади.
– Кўплаб давлатлар миллий манфаатидан келиб чиқиб Россиядан энергия ресурслари харид қилмоқда, – дейилган идора баёнотида. – Айни вазиятда фақат бизга нисбатан санкция қўллаш нотўғри.
Таҳлилчилар навбатдаги тариф тўқимачилик, заргарлик буюмлари, автомобиль қисмлари ва денгиз маҳсулотлари каби Ҳиндистоннинг асосий экспорт тармоғи товарларига жиддий зарар етказишини тахмин қилмоқда.
– Мамлакат экспортининг қарийб 55 фоизи таъсир доирасига тушади, – дейди Ҳиндистон экспортчилар федерацияси вакили. – Яқин ойларда умумий савдо ҳажми 40-50 фоиз камайиши мумкин.
Айни вақтда электроника ва фармацевтика маҳсулотлари бождан озод қилингани айтиляпти.
РФ ҳозир Деҳлига энг йирик нефть етказиб берувчи сифатида умумий импортнинг 35 фоизини қоплайди. Таҳлилларга кўра, Ҳиндистон жорий йил биринчи ярмида Москвадан кунига 1,75 миллион баррель нефть сотиб олган.
АҚШ ҳукумати ушбу тарифни Россияга нисбатан босимни кучайтириш ва бошқа мамлакатларга огоҳлантириш сифатида изоҳлаган. 27 август санаси эса янги санкция ҳамда РФ нефтини импорт қилаётган давлатларга 100 фоизгача бож жорий этилиши эҳтимоли билан кесишмоқда.
АҚШнинг ўзи ҳам Россия билан чекланган ҳажмда савдо олиб бораётганини танқид қилган ҳинд расмийлари мазкур босимни сиёсий икки ёқламалик, дея баҳоламоқда.
Мусулмон Зиё, ЎзА