Сирдарёда медиа марказ очилди
Матбуот ва оммавий ахборот воситалари ходимлари куни арафасида вилоят журналистлари, блогерлар, матбуот котиблари ҳамда медиа соҳаси вакиллари учун муҳим аҳамиятга эга қарор қабул қилинди. Энди Сирдарёда замонавий рақамли технологиялар ва сунъий интеллект имкониятларини ўзида мужассам этган янги медиа марказ фаолият юритади.
Ўзбекистон Республикасининг «Давлат ҳокимияти ва бошқаруви органлари фаолиятининг очиқлиги тўғрисида»ги Қонуни ҳамда Президентнинг 2026 йил 7 апрелдаги «Республика ҳудудларини жадал комплекс ривожлантириш учун танлаб олинган туман (шаҳар)ларда амалий чора-тадбирларни амалга ошириш тўғрисида»ги қарори ижросини таъминлаш мақсадида Сирдарё вилояти ҳокимининг қарори билан вилоят ҳокимлиги Ахборот хизмати ҳузурида Ихтисослашган медиа ва рақамли технологиялар маркази ташкил этилди.
Бу оддий ташкилий ўзгариш эмас. У давлат органлари фаолиятининг очиқлиги ва шаффофлигини янада мустаҳкамлаш, аҳоли билан замонавий коммуникация механизмларини йўлга қўйиш ҳамда ахборот сиёсатини рақамли технологиялар асосида янги босқичга олиб чиқишга қаратилган муҳим институционал ечимдир.
Сўнгги йилларда мамлакатимизда давлат органлари фаолиятининг очиқлигини таъминлаш, жамоатчилик билан самарали мулоқотни кучайтириш ва рақамли платформалар имкониятларидан кенг фойдаланиш борасида изчил ислоҳотлар амалга оширилмоқда. Сирдарё вилоятида ташкил этилган мазкур марказ ана шу ислоҳотларнинг мантиқий давоми бўлди.
Марказ "Sirdaryo Media Digital Center (SMDC)" бренди остида фаолият юритади. У замонавий фото ва видеоконтент тайёрлаш, давлат ташкилотлари учун медиа маҳсулотлар ишлаб чиқиш, веб-сайтлар ва мобил иловалар яратиш, ижтимоий тармоқлар мониторингини амалга ошириш, PR ва коммуникация стратегияларини ишлаб чиқиш, колл-марказ хизматларини ташкил этиш ҳамда сунъий интеллект асосида рақамли ечимларни амалиётга жорий этиш каби вазифаларни бажаради.
Марказ фаолиятининг яна бир муҳим жиҳати — унинг давлат бюджетига қўшимча юкламасиз ишлашидир. У ўзини ўзи молиялаштириш механизми асосида давлат ва хусусий секторга шартнома асосида юқори сифатли медиа ва рақамли хизматлар кўрсатади. Бу муассасанинг иқтисодий барқарорлигини таъминлаш билан бирга, бозор талабларига мос инновацион хизматларни ривожлантириш имконини ҳам беради.
Янги марказнинг ташкил этилиши журналистлар ва матбуот хизматлари фаолияти учун ҳам янги имкониятлар эшигини очади. Энди ахборот материалларини замонавий форматларда тайёрлаш, мультимедиа журналистикасини ривожлантириш, сунъий интеллект имкониятларидан самарали фойдаланиш ҳамда тезкор ва сифатли контент ишлаб чиқариш учун ягона профессионал майдон шаклланади.
Бу, айниқса, рақамли медиа жадал ривожланаётган бугунги кунда ҳудудий журналистика рақобатбардошлигини ошириш, давлат идоралари ва жамоатчилик ўртасида самарали ахборот алмашинувини таъминлаш ҳамда аҳолининг ишончли ахборотга бўлган эҳтиёжини тўлиқ қондиришда муҳим аҳамият касб этади.
Энг муҳими, мазкур қарор Сирдарё вилоятида медиа соҳасини мутлақо янги босқичга олиб чиқиш, рақамли трансформация жараёнларини жадаллаштириш ва давлат ахборот сиёсати самарадорлигини янада оширишга хизмат қилади.
Сирдарё вилояти ҳокимининг ахборот сиёсати масалалари бўйича маслаҳатчиси — матбуот котиби Манучеҳр Мирзаевнинг таъкидлашича, ушбу қарор Матбуот ва оммавий ахборот воситалари ходимлари куни арафасида Сирдарёлик журналистлар, блогерлар, матбуот котиблари ва бутун ахборот соҳаси вакиллари учун муносиб байрам совғаси бўлди.
— Бугун ахборот соҳасида тезкорлик, профессионаллик ва рақамли технологиялар билан ҳамнафас ишлаш давр талаби ҳисобланади. Ихтисослашган медиа ва рақамли технологиялар марказининг ташкил этилиши ҳам ана шу эҳтиёждан келиб чиққан муҳим ташаббусдир. Марказ, аввало, давлат органлари фаолиятининг очиқлиги ва шаффофлигини таъминлаш, аҳоли билан самарали коммуникацияни йўлга қўйиш ҳамда ахборот хизматларини замонавий техник ва интеллектуал ечимлар билан қўллаб-қувватлашга хизмат қилади.
Эътиборли жиҳати шундаки, марказ фақат медиаконтент тайёрлаш билан чекланмайди. У ижтимоий тармоқлар мониторинги, 1428 ишонч телефони ва виртуал қабулхона фаолиятини мувофиқлаштириш, рақамли лойиҳаларни амалга ошириш, давлат ҳамда хусусий сектор учун профессионал медиа хизматларини кўрсатиш каби қатор йўналишларни қамраб олади.
Яна бир муҳим жиҳати — марказ давлат бюджетига қўшимча юкламасдан, ўзини ўзи молиялаштириш тамойили асосида ишлайди. Бу бозор талабларига мос, рақобатбардош ва инновацион хизматларни ривожлантириш учун мустаҳкам замин яратади.
Ишончим комилки, "Sirdaryo Media Digital Center" нафақат Сирдарё вилояти, балки республикада ҳудудий медиа инфратузилмасини ривожлантириш бўйича илғор тажриба марказларидан бирига айланади. Бу марказ журналистлар, матбуот котиблари ва контент яратувчилар учун янги имкониятлар эшигини очиб, давлат ахборот сиёсати самарадорлигини янада юксалтиришга муносиб ҳисса қўшади.
Ғулом Примов, ЎзА мухбири
