Корея Халқ Демократик Республикаси раҳбари Ким Чен Ин АҚШ Президенти Дональд Трампнинг “Олтин гумбаз” ҳимоя тизимини яратиш ҳақидаги чиқишидан сўнг фазовий ядро уруши билан таҳдид қилмоқда.

Трамп уч йилда тайёр бўладиган “Олтин гумбаз” Хитой ва Россиянинг илғор ракеталарини йўқ қила оладиган, космосда жойлашадиган сунъий йўлдош ва тутқичлардан иборат бўлишини айтган. Лойиҳа қиймати 175 миллиард долларга баҳоланмоқда. Умуман, Вашингтон, Москва ва Пекин ўртасидаги кураш самони ҳарбий қарама-қаршилик майдонига айлантирадигандек.

Бинобарин, Ким Чен Ин АҚШни ҳавода ядро уруши бошлаётганликда айблаб, шундай деган:

– “Олтин гумбаз” Америка сиёсатининг одатий маҳсули, такаббурлик ва ўзбошимчалик, – деган Шимолий Корея етакчиси. – Ушбу лойиҳа фазодаги ядровий уруш учун сценарийсидир.

Бошқа томондан КХДР ҳам ҳарбий салоҳиятини оширишда давом этяпти. Яқинда Пхеньян сунъий интеллектга эга худкуш дрон ва ҳужумда ҳаво огоҳлантириш тизими вазифасини бажарадиган самолётни намойиш қилди. Айтилишича, ушбу қурилма Россия юк самолётидан илҳомланиб яратилган.