Руминия пойтахти Бухарест шаҳрида классик шахмат бўйича “Grand Chess Tour” тизимидаги “Superbet Chess Classic Romania-2025” турнири якунланди.

Тўққиз кун давомида ўтган шиддатли баҳслар натижасида 8-турда ҳамюртимиз Нодирбек Абдусатторов билан дурангга эришган Франция вакили Алиреза Фирузжа 9-турда қора доналарда руминиялик Богдан-Даниэль Дьякни мағлубиятга учратиб, етакчиликка эришди.

Ушбу турда шунингдек, ҳиндистонлик Рамешбабу Прагнанандха ва франциялик Максим Вашье-Лаграв ҳам рақиблари билан муросага келган ҳолда 5,5 очко жамғаришга муваффақ бўлишди.

Нодирбек Абдусатторов 9-турда АҚШ шарафини ҳимоя қилаётган Уэсли Со билан рўбарў келди.

Қизиқарли кечган ўйинда оқ доналарда ҳаракатланган Абдусатторов устунликка эга бўлиши ҳам мумкин эди. Аммо кучли ҳимояланган ҳолда баҳсни давом эттирган АҚШ вакили Нодирбекни муроса йўлини танлашга кўндирди.

Баҳслар якунига кўра, Алиреза Фирузжа, Рамешбабу Прагнанандха ва Максим Вашье-Лаграв тай-брекда куч синашди.

Тай-брекнинг илк ўйинда Фирузжа билан дурангга эришиб, иккинчи учрашувда Вашье-Лагравни мағлубиятга учратган ҳиндистонлик Рамешбабу Прагнанандха ғолибликка эришиши ортидан 77,667 АҚШ долларига ва рейтинг учун 10 очкога эга чиқди.

“Superbet Chess Classic Romania-2025”нинг ортда қолган 9 та тур ўйинларининг 7 тасида дуранг, 1 тасида мағлубият ва 1 тасида муваффақиятга эришган Нодирбек Абдусатторов 4,5 очко билан мусобақада 5-ўринни эгаллади.

"Grand Chess Tour 2025" таснифига кирувчи учинчи турнир жорий йилнинг 1-6 июль кунлари Хорватиянинг Загреб шаҳрида бўлиб ўтади.

Унда Н.Абдусатторов ФИДЕ рейтингида етакчилик қилаётган собиқ жаҳон чемпиони Магнус Карлсен, амалдаги жаҳон чемпиони Доммаражу Гукеш, Руминия турнири ғолиби Рамешбабу Прагнанандха, шунингдек Алиреза Фирузжа, Уэсли Со, Аниш Гири, Фабиано Каруана, Ян-Кшиштоф Дуда, Иван Шарич билан куч синашади.

Т.Рўзиев,

ЎзА