Шахмат: Нодирбеклар Европа кубогида қатнашмоқда
Черногориянинг Будва шаҳрида шахмат бўйича клублар ўртасида “Open” ва аёллар йўналишида ўтаётган Европа кубоги баҳсларида мамлакатимизнинг маҳоратли шахматчилари Нодирбек Абдусатторов ва Нодирбек Ёқуббоев дона сурмоқда.
“Open” гуруҳида 108 та жамоа қатнашаётган бўлса, FIDE рейтингида кучли бешликни эгаллаб турган Н.Абдусатторов Руминиянинг амалдаги чемпиони “SuperChess Romania” клуби таркибида, Н.Ёқуббоев эса Чехиянинг “Novy Bor Chess Club” сафида дона сурмоқда.
Айтиш лозимки, ортда қолган 2 та турда “SuperChess Romania” ва “Novy Bor Chess Club” жамоалари ғалаба қозониб, етакчилар қаторида ҳаракатланмоқда.
Бугун, 19 октябрь куни “SuperChess Romania” жамоаси “Cheddleton Savills Caterling” билан, “Novy Bor Chess Club” аъзолари “C.A. Silla Integrant Col-lectius” жамоаси билан куч синашади.
Мазкур баҳсда Нодирбек Абдусатторов “Cheddleton Savills Caterling” аъзоси Балаж Чонка билан 1-тахтада баҳс олиб борса, Нодирбек Ёқуббоев “C.A. Silla Integrant Col-lectius” вакили Алвар Алонсо Россел қаршилигини енгишга ҳаракат қилади.
Эслатиб ўтамиз, умумий мукофот жамғармаси 40 минг евродан иборат Европа кубоги баҳслари 23 октябрга қадар давом этади.
Т.Рўзиев,
ЎзА
