Бугун, 16 июлдан АҚШда “Freestyle Chess Grand Slam Las Vegas” турнири бошланади.

Мукофот жамғармаси 750 минг АҚШ долларидан иборат мазкур нуфузли мусобақада ҳамюртларимиз Нодирбек Абдусатторов ва Жавоҳир Синдоров дунёнинг энг кучли гроссмейстерлари Магнус Карлсен, Ҳикару Накамура, Фабиано Каруана, Левон Аронян, Уесли Со, Рей Робсон, Сем Севиан, Ҳанс Ниеманн, Леиниер Домингес, Аржун Эригаиси, Рамешбабу Праггнанандҳаа, Винцент Кеймер, Видит Гужратҳи ва турнирда иштирок этаётган ягона аёл шахматчи Бибисара Ассаубаева билан куч синашади.  

Бугун турнирнинг дастлабки саралаш мусобақасида шахматчилар 8 нафар қатнашчини жамлаган гуруҳларда 7 та турли айлана тизимдаги баҳсларни ўтказади.  

Илк турларда Нодирбек Абдусатторов ҳиндистонлик Рамешбабу Праггнанандҳа, АҚШлик Уесли Со, Левон Аронян, қозоғистонлик Бибисара Ассаубаева,  германиялик Винцент Кеймер, норвегиялик Магнус Карлсен ва Жавоҳир Синдоров билан тўқнаш келса, Жавоҳир Синдоров Бибисара Ассаубаева,  Винцент Кеймер, Магнус Карлсен, Левон Аронян, Рамешбабу Праггнанандҳа, Уесли Со ҳамда Абдусатторовга қарши дона суради.  

Мазкур ўйинлар натижасида юқори ва пастки қатордан жой олган иштирокчилар эртага, 17 июль куни чорак финал мусобақаларида қатнашади.  

Нуфузли мусобақа 21 июлга қадар давом этади.  

Тўлқин Рўзиев, ЎзА