Сеул Украинадан махфийликни бузгани учун узр сўрашни талаб қилмоқда (+видео)
Украина Президенти Владимир Зеленский Украинага қарши урушда қатнашган ва асирга тушган икки нафар шимолий кореялик ҳарбий Жанубий Кореяга юборилганини маълум қилгач, Киев ва Сеул ўртасида жанжал келиб чиқди, деб хабар берди "Euronews".
Президент Ли Жэ Мён маъмурияти Украинадан ушбу мамлакат ҳудудида асирга олинган икки нафар шимолий кореялик ҳарбийни Сеулга юбориш чоғида келишилган махфийлик тартибини бузгани учун узр сўрашни талаб қилди. Жанжал ўтган ҳафта Зеленский КХДРнинг икки аскари Жанубий Кореяга юборилганини маълум қилгандан кейин авж олди. Украина етакчиси асирларни тирик ҳолда қўлга олиш осон кечмаганини ҳам қўшимча қилган.
Кучайиб бораётган бу баҳс Киевнинг иттифоқчилар, жумладан Жанубий Кореядан Россия ҳужумига қарши туриш учун қурол-яроқ олиш борасидаги саъй-ҳаракатини йўққа чиқариши мумкин.
Баёнотдан бир неча соат ўтиб, Ли Жэ Мён Украина томонини танқид қилди.
– Украина нима учун келишувни бузиб, бу масалани ошкор қилганини тушунмаяпман, – деб ёзган у ижтимоий тармоқда.
Зеленскийнинг ёрдамчиси Дмитрий Литвин эса вазиятни юмшатишга уриниб, Президент фақат ҳарбийлар топширилгани ҳақидаги фактни ошкор қилганини айтиб, шу тариқа Украина очиқ мамлакат эканини таъкидлаган. Сеул эса ҳолатни ўзаро ишонч бузилиши сифатида баҳолаган.
Жанубий Корея Президентининг жамоатчилик билан алоқалар бўйича вакили баёнотида мамлакат ушбу масала юзасидан зарур қўшимча чора кўрилаётганини билдирди. Яъни, маъмурият Киевдан расмий тушунтириш ва узр талаб қилмоқда.
Ўтган йил бошида Украина Россия томонида жанг қилаётган икки нафар шимолий кореялик ҳарбийни асирга олган эди. Улардан бири разведка бўлинмасида хизмат қилганини айтган. Жанубий Корея Президенти фикрича, махфийлик масаласи атрофидаги можаро ядровий қуролга эга Шимолий Корея билан жиддий тарангликка олиб келиши, Сеулга нисбатан душманлик кайфиятини кучайтириши мумкин.
Кенжа Бекжонов, Улуғбек Тўхтаев (видео), ЎзА
