Сергей Фомин Хитойда навбатдаги совринини кўзламоқда
Хитойда Халқаро теннис федерацияси томонидан ўтказилаётган М25 таснифидаги турнирда ҳамюртимиз Сергей Фомин яккалик ва жуфтлик баҳсларида ярим финалга чиқди.
Аниқроқ айтадиган бўлсак, Сергей Фомин яккаликлар ўртасидаги чорак финал босқичида Буюк Британия шарафини ҳимоя қилган Карлес Брумни уч сетда 3:6, 6:3, 6:4 ҳисобида таслим этди ва ярим финалга чиқди. Энди теннисчимиз финал остонасида нейтрал теннисчи Илья Симакин ва Хитой Тайпейи вакили Куан-Йи Ли учрашуви ғолиби билан рақобатлашади.
Шунингдек, Сергей Фомин жуфтлик беллашувларида қозоғистонлик Григорий Ломакин билан тандем ҳосил қилди ва улар чорак финалда нейтрал теннисчи Данил Остапенко ва АҚШ вакили Мишэль Жу жуфтлигини 6:3, 6:1 ҳисобида енгди.
Шу тариқа, Сергей ва Григорий сўнгги ҳал қилувчи финал йўлланмаси учун ўтадиган ўйинда Карлес Брумни ва италиялик Карлес Баррий дуэтига қарши куч синашади.
Жавоҳир Тошхўжаев,
ЎзА
