Сербиянинг илғор боғдорчилик тажрибаси Ўзбекистонда жорий этилади
Ўзбекистонда замонавий интенсив боғдорчиликни ривожлантириш, сифатли ва сертификатланган мева кўчатларини етиштириш борасида халқаро ҳамкорлик кенгаймоқда.
Шу мақсадда қишлоқ хўжалиги вазири Иброҳим Абдураҳмонов Сербиянинг “KALEM VOĆE MILADINOVIĆ” компанияси вакиллари билан учрашди.
Мулоқот давомида Ўзбекистонда замонавий мева кўчатлари питомнигини ташкил этиш, илғор кўчат етиштириш ва пайвандлаш технологияларини жорий қилиш, шунингдек, интенсив боғлар барпо этиш бўйича ҳамкорлик истиқболлари муҳокама қилинди.
Дастлабки босқичда лойиҳани Академик М.Мирзаев номидаги Боғдорчилик, узумчилик ва виночилик илмий-тадқиқот институти ҳудудида бошлаш таклиф этилди. Бу ерда замонавий мева кўчатларини етиштиришни йўлга қўйиш ҳамда тажриба майдонларини ташкил этиш режалаштирилмоқда.
Ҳамкорликнинг яна бир муҳим йўналиши — маҳаллий мутахассислар ва талабаларнинг амалий билим ва кўникмаларини ошириш.
Сербиянинг илғор тажрибасини Ўзбекистон шароитига мослаштириш мақсадида соҳа вакиллари ҳамда талабалар учун амалий ўқув ва стажировка дастурларини ташкил этиш масаласи кўриб чиқилди. Дастлабки келишувларга кўра, 20–30 нафар талаба ва соҳа вакилини замонавий кўчат етиштириш, пайвандлаш, пайвандтагларни танлаш ҳамда интенсив боғларни ташкил этиш йўналишларида ўқитиш имкониятлари кўриб чиқилмоқда.
Учрашув якунида “KALEM VOĆE MILADINOVIĆ” компанияси вакилларининг 2026 йил сентябрь–октябрь ойларида Ўзбекистонга ташрифини ташкил этиш бўйича келишувга эришилди.
Муҳайё Тошқораева,
ЎзА
