Сурхондарё вилоятида «Сариосиё» ҳудудий аэропортини реконструкция қилиш ишлари якунига етди. Аэропорт “SilkAvia” авиакомпаниясига тегишли АTR-72-600 русумли самолётини қабул қилди.

“Uzbekistan Airports” авиакомпанияси вакилларининг сўзларига кўра, ҳудудий аэропортда сунъий қопламаларни  капитал таъмирлаш ишлари олиб борилган. Хусусан, учиш-қўниш (1550 метр) ва йўналиш йўлаклари ҳамда ATR-72-600 типидаги иккита ҳаво кемаси жойлашадиган қароргоҳни ўз ичига олган перронда узунасига  икки қатламда  асфальтбетон ётқизилди.

«Учиш-қўниш йўлаги 1976 йилдан буён ишлаб келаётгани сабабли  парвозлар хавфсизлигини таъминлаш ҳамда АТR-72 типидаги ва қуйи классдаги ҳаво кемаларини қабул қилиш ва чиқариш мақсадида «Сариосиё» аэропортининг аэродром мажмуасини капитал таъмирлаш зарурати бор эди.  Бугун аэропорт техник рейсни қабул қилди. Бу аэродромнинг ҳаво кемаларини қабул қилиш ва чиқаришга тўлиқ тайёрлигини кўрсатди», – деб хабар бермоқда “Uzbekistan Airports” авиакомпанияси матбуот хизмати. 

Аэропорт ҳудудида 100 нафаргача бўлган йўловчиларга мўлжалланган янги терминални қуриш ишлари ҳам  ниҳоясига етмоқда.  Барча ишлар якунлангач, бир ой ичида «Сариосиё» аэропортида мунтазам парвозларни йўлга қўйиш режалаштирилмоқда.

Эслатиб ўтамиз, «Сариосиё» аэропорти сўнгги йилларда фаолияти тикланган  бешинчи ҳудудий аэропорт бўлди. Бунгача Мўйноқ, Қўқон, Шаҳрисабз ва Зомин аэропортлари  реконструкция қилиниб, очилган эди. 

Роман БОНДАРЧУК тайёрлади, ЎзА