Бугун, 11 сентябрь эрта тонгда Олимпия ўйинлари ва жаҳон чемпионатлари ғолиблари бўлган Руслан Нуруддинов, Акбар Жўраев, шунингдек, маҳоратли полвонлар Муҳаммадқодир Тоштемиров, Сарварбек Зафаржонов, Рустам Жангабоев, Шарофиддин Амриддинов, Суннатилла Ўсаров, Турсуной Жабборова ва Ригина Адашбоевадан иборат мамлакатимиз оғир атлетикачиларининг иккинчи таркиби жаҳон чемпионатида иштирок этиш учун Саудия Арабистонига йўл олди.
Маълумки, Ар-Риёд шаҳрида оғир атлетика бўйича катталар ўртасидаги жаҳон чемпионати шиддатли курашларга бой тарзда давом этмоқда.
Париж-2024 Олимпиадаси ва Халқаро оғир атлетикасининг муҳим рейтинг очколари ўйналаётган чемпионатнинг ортда қолган беллашувларида Ўзбекистон терма жамоаси аъзоларидан Жамила Панфилова, Адҳамжон Эргашев, Достон Ёқубов ҳамда Шаҳлохон Абдуллаева ўз вазнларидаги чиқишларини якунлашди.
Ҳамюртларимиз гарчи совринли ўринлардан жой олмаган бўлса-да, Париж-2024 ва жаҳон рейтингидаги муҳим талабларни бажаришди.
Бугун чемпионат мусобақаларида терма жамоамиз аъзоларидан Муҳаммадқодир Тоштемиров 81 килограммда, Сарварбек Зафаржонов 89 килограммда ғолиблик учун курашга киришади.
Юртимиз спорт фахри бўлган Акбар Жўраев ва Руслан Нуруддинов иштирокидаги мусобақалар 16 сентябрь куни ўтказилса, энг оғир вазн +109 килограммлилар ўртасидаги баҳслар 17 сентябрь куни ташкил этилади. Ушбу оғирликда мамлакатимиз терма жамоаси таркибида ўз салоҳиятини намойиш этиб келаётган Рустам Жангабоев чиқиш қилади.
Ҳозирча медаллар жамғариш борасида Хитой, Таиланд, Вьетнам, АҚШ терма жамоалари етакчилик қилмоқда.
Т. Рўзиев,
ЎзА