Рубио: Куба аллақачон барбод бўлган ва барча соҳада муваффақиятсизликка учраган давлатдир
АҚШ Давлат котиби Марко Рубионинг фикрича, Куба амалда “барбод бўлган” ва ўз вазифасини бажара олмайдиган давлатга айланган. “Fox News” телеканалига берган интервьюсида у мамлакат тизими мутлақо ишдан чиққани, орол учун сиёсий ва иқтисодий эркинликка ўтиш даври зарурлигини таъкидлади.
Сиёсатчи Гавана раҳбарияти аллақачон 20 йил олдин ўлиб бўлган “инқилоб” ҳақида сафсата сотишда давом этаётгани, амалда эса на фаолият юритадиган иқтисодиёт ва на тайинли ҳукумат шакллантирилганини таъкидлаган.
АҚШ дипломатияси раҳбари иқтисодий инқироз оқибатини оммавий миграция мисолида тушунтиришга уринган. Яъни, 2021 йилдан бери қарийб 20 фоиз аҳоли Кубани тарк этгани тўлиқ инқирознинг яққол исботи.
Шунингдек, Рубио фақат иқтисодий ислоҳот билан вазиятни ўнглаб бўлмаслиги, сиёсий эркинликсиз тараққиётга эришиш имконсиз эканини ҳам қўшимча қилган.
Ф.Яхшибоева, ЎзА
