Реал ва Мбаппе Хитойдан кечирим сўради
“Real Madrid” клуби ҳужумчиси Килиан Мбаппенинг Хитой собиқ раҳбари Мао Цзэдун ҳақидаги гапи кескин эътирозга сабаб бўлгач, испан клуби ва футболчининг ўзи хитойликлардан расман кечирим сўради.
Гап шундаки, футбол оламида кучли таъсирга эга бўлгани учун Европа матбуоти Мбаппега “диктатор” лақабини қўйган. Мухлислар эса унинг юзини хитойликлар учун дахлсиз ҳисобланган Мао Цзэдун танасига монтаж қилиб, интернет тармоғида кулгили мемлар ясашган.
Мбаппе бир подкастда шу мемни муҳокама қила туриб, бу “қайсидир хитойлик диктатор” дея беписанд ва масхаромуз руҳда тилга олган. Ушбу баёнотдан сўнг Хитойнинг “Mengniu”, “Shanghai Milkground Food Tech” ва “Eastroc Beverage” каби йирик компаниялари Мбаппе билан ҳамкорликни зудлик билан тўхтатди.
Мао Цзэдун ҳақида ҳазил қилиш қатъиян тақиқланган Чин жамиятидаги бундай кескин муносабатдан кейин футболчи ва унинг клуби вазиятни юмшатишга мажбур бўлди. “Real Madrid” ўз баёнотида Хитой халқи ва ушбу мамлакат тарихига чуқур ҳурмат изҳор этган. ХХР Ташқи ишлар вазирлиги эса футболчининг узри қабул қилинганини билдирди.
Ф.Яхшибоева, ЎзА
