Қоракўл — янгиланишлар, бунёдкорлик ва имкониятлар маскани

Ватанимиз мустақиллигининг 35 йиллиги арафасида юртимизнинг ҳар бир гўшасида янгиланиш ва бунёдкорлик руҳи янада кучаймоқда. Айниқса, мамлакатимиз тараққиётининг янги босқичида давлат раҳбари ташаббуси билан ҳудудларни комплекс ривожлантириш, чекка ва чегара ҳудудларида аҳоли учун муносиб шароит яратиш, янги иш ўринлари ташкил этиш ва хонадонлар даромадини оширишга қаратилган ислоҳотлар ўз самарасини бермоқда.

Буни Бухоро вилоятининг Туркманистон Республикаси билан чегарадош, тарихан меҳнаткаш ва салоҳиятли ҳудудларидан бири — Қоракўл тумани мисолида ҳам яққол кўриш мумкин.

Туманда “35 йиллик шарафли йўл” мавзусида ташкил этилган медиа-тур ана шу ўзгаришларни кенг жамоатчиликка намоён этди. Унда оммавий ахборот воситалари ходимлари, журналистлар ва блогерлар иштирок этиб, Қоракўлдаги бунёдкорлик, саноат, тадбиркорлик ва аҳоли бандлигини таъминлаш борасида амалга оширилаётган ишлар билан яқиндан танишди.

Медиа-турнинг дастлабки манзили — “Янги Ўзбекистон” массиви. Бу ердаги бунёдкорлик ишларига назар ташлар экан, ҳудуднинг қиёфаси тобора ўзгариб, замонавий ва обод масканга айланаётганига гувоҳ бўлиш мумкин.

Эътиборлиси, бу жараён оддий қурилишлар мажмуи эмас. Унинг замирида инсон қадри, аҳоли учун муносиб турмуш шароити яратиш, янги ҳаёт тарзини шакллантиришдек эзгу мақсадлар мужассам.

Чегарага яқин ҳудудларда бундай кенг кўламли янгиланишларнинг амалга оширилаётгани эса алоҳида аҳамиятга эга. Зеро, мамлакат тараққиётининг бугунги манзарасида “чекка ҳудуд” деган тушунча тобора ўз мазмунини йўқотиб, ҳар бир маҳалла, ҳар бир қишлоқ янги имкониятлар майдонига айланмоқда.

Қоракўлдаги ўзгаришларнинг яна бир муҳим жиҳати — ишлаб чиқариш қувватларининг кенгайиши ва аҳоли бандлигининг таъминланаётганидир.

Медиа-тур иштирокчилари “KARAKUL SPINNING” МЧЖ фаолияти билан танишди. Корхонада йилига 5 минг тоннадан ортиқ ип-калава маҳсулотини қайта ишлаш имконияти яратилган. Энг муҳими, ишлаб чиқариш қувватининг йўлга қўйилиши натижасида 280 та янги иш ўрни ташкил этилган. Бу рақамлар ортида 280 нафар инсоннинг меҳнати, оиласи ва эртанги кунига бўлган ишончи бор.

Туманда тадбиркорликнинг маҳаллий имкониятларга таяниб ривожланаётгани ҳам эътиборга молик.

Тадбиркор Акбар Абдуллаев томонидан ташкил этилган “Абай патирлари” цехида нон ва патир маҳсулотлари, турли қандолатлар ҳамда тортлар тайёрланмоқда. Бу ерда 30 нафар хотин-қиз доимий иш билан таъминланган. Демак, тадбиркорлик — фақат маҳсулот ишлаб чиқариш ёки даромад олиш эмас. У оила фаровонлиги, аёллар бандлиги ва маҳалланинг иқтисодий қудратини оширадиган муҳим омилга айланмоқда.

Қоракўлдаги янгиланишларнинг яна бир манзили — Жиғачи маҳалласи. Бу ерда “Парвоз Плюс Файз” МЧЖ томонидан ташкил этилган замонавий тикувчилик корхонаси фаолият юритмоқда. Бугун корхонада 120 нафар хотин-қиз замонавий ускуналарда меҳнат қилмоқда. Бу манзаранинг ўзиёқ бир ҳақиқатни кўрсатади: замонавий ишлаб чиқаришни йирик шаҳарлардагина эмас, балки маҳаллаларнинг ўзида ҳам ташкил этиш мумкин. Энг муҳими, иш ўрни инсонни иш излаб узоққа кетишга эмас, ўз маҳалласида меҳнат қилиб, оиласи даромадини оширишга ундайди.

Жиғачи маҳалласидаги яна бир ташаббус эса том маънода хонадонларни даромад манбаига айлантирмоқда.

Ғайрат Искандаров раҳбарлигидаги “Ҳасанобод шифо бол” фермер хўжалиги асаларичиликни хонадонларга кенг жорий этишни йўлга қўйган. Маҳалла аҳолисига 10 тадан асалари уяси тарқатилиб, хонадон эгалари даромадли фаолиятга жалб этилмоқда.

Хонадонларда етиштирилган асал эса фермер хўжалиги томонидан сотиб олиниб, қайта ишланади ва қадоқланади. Корхонанинг йилига 70 тонна асални қайта ишлаш қуввати мавжуд. Бу — кичик имкониятдан катта натижа яратишнинг ўзига хос намунаси.

Асаларичиликнинг хонадонларга кириб бориши орқали аҳоли қўшимча даромадга эга бўлмоқда, маҳаллада ишлаб чиқариш занжири шаклланмоқда, тайёр маҳсулот эса бозорга чиқарилмоқда.

Медиа-тур давомида кузатилган манзаралар бир-бири билан уйғун: янги массивлар, замонавий ишлаб чиқариш корхоналари, хотин-қизлар бандлиги, хонадонбай тадбиркорлик, қайта ишлаш қувватлари. Буларнинг барчаси бир мақсадга — инсоннинг даромадини ошириш, оила фаровонлигини таъминлаш ва ҳудуд иқтисодий салоҳиятини юксалтиришга хизмат қилмоқда.

Бир вақтлар мамлакатимиз харитасида чегара ҳудуди сифатида тасаввур қилинадиган Қоракўл бугун янги имкониятлар, инвестиция, ишлаб чиқариш ва бунёдкорлик жараёнлари билан ўз қиёфасини намоён этмоқда.

Туркманистон Республикаси билан чегарадош ҳудуднинг тобора яшараётгани, янги иншоотлар, ишлаб чиқариш корхоналари ва замонавий ташаббуслар билан бойиб бораётгани — юртимиздаги тараққиёт ҳудуд танламаслигининг ёрқин ифодасидир.

Мустақилликнинг 35 йиллиги — шунчаки сана эмас. Бу босиб ўтилган шарафли йўл, эришилган натижалар ва келажак учун белгиланаётган улкан мақсадлар сарҳисобидир. Қоракўлдаги бугунги ўзгаришлар ҳам ана шу тарихнинг бир парчаси. Бу ерда бунёдкорлик бетон ва ғиштда эмас, инсон тақдирида намоён бўлмоқда. Янги корхона — янги оила даромади. Янги иш ўрни — янги умид. Тадбиркорлик — янги имконият. Обод маҳалла — фаровон ҳаёт демакдир.

Медиа-тур иштирокчилари гувоҳ бўлган воқелик шуни кўрсатдики, Қоракўл бугун шунчаки янгиланмаяпти — у ўзининг янги тараққиёт қиёфасини яратмоқда.

Энг муҳими, бу жараённинг марказида инсон бор. Шу маънода Қоракўлнинг бугунги қиёфаси мустақиллик йилларида босиб ўтилган 35 йиллик шарафли йўлнинг амалий натижаси, эртанги янада обод ва фаровон ҳаётнинг эса мустаҳкам пойдеворидир.

Зариф Комилов, ЎзА мухбири