Қўқон пичоқсозлик мактаби анъаналари Марғилонда намойиш этилди
Марғилон ҳунармандчиликни ривожлантириш марказида миллий ҳунармандчилик анъаналарини асраб-авайлаш, ривожлантириш ва кенг тарғиб этишга қаратилган “Қўқон пичоқлари” кўргазмаси бўлиб ўтди.
“Ҳунарманд” уюшмаси, Фарғона вилояти ва Марғилон шаҳар ҳокимликлари ташаббуси билан ташкил этилган кўргазмада водий вилоятларидан ташриф буюрган пичоқсоз усталар ўзларининг ноёб ҳунармандчилик намуналарини намойиш этди.
Тадбирда миллий пичоқсозлик санъатини янада ривожлантириш, устоз-шогирд анъаналарини давом эттириш, моҳир усталар тажрибасини оммалаштириш ва ҳунармандлар ўртасида ўзаро тажриба алмашишни кенгайтириш масалаларига алоҳида эътибор қаратилди.
Кўргазмадан турли шакл ва безакларга, ўзига хос ишлов бериш услубига эга пичоқлар ўрин олди. Уларда усталарнинг юксак маҳорати, нозик диди ва ижодий ёндашуви ўз ифодасини топган. Намойиш этилган ҳунармандчилик намуналари Қўқон пичоқсозлик мактабининг бой анъаналари, миллий амалий санъатимизнинг ўзига хос жиҳатларини акс эттирди.
Шунингдек, тадбир доирасида адрас тўқиш, гиламдўзлик, дўппидўзлик ва кулолчилик йўналишларида фаолият юритаётган ҳунармандлар ҳам ўз маҳсулотларини тақдим этди. Бу кўргазмага янада файз бағишлаб, халқимизнинг бой ҳунармандчилик мероси ва миллий амалий санъатининг ранг-баранглигини намоён қилди.
[gallery-32449]
Кўргазмада фаол иштирок этиб, ўз маҳоратини намойиш этган ҳунармандлар ташаккурнома ва эсдалик совғалари билан тақдирланди.
Муқимжон ҚОДИРОВ (сурат), ЎзА
