Фармон ва ижро
Ҳудудларда ер участкаларини ажратишда, шаффоф ва бозор тамойилларига асосланган тартибни такомиллаштиришга алоҳида эътибор қаратилмоқда. Айниқса, пахта ва ғалладан қисқартирилаётган ерда экспортбоп, ҳосилдор экинлар етиштиришни кўпайтириш, озиқ-овқат хавфсизлиги ва нархлар барқарорлигини таъминлаш чоралари кўрилмоқда.
Президентимизнинг 2025 йил 3 февралдаги “Қишлоқ хўжалиги экин майдонлари унумдорлигини ошириш, тармоққа инвестициялар жалб қилиш учун қулай шарт-шароит яратиш бўйича навбатдаги чора-тадбирлар тўғрисида”ги фармони бу борада муҳим дастуриламал бўлмоқда.
Муҳими, бу ҳужжат орқали деҳқончилик билан шуғулланувчиларга янада эркинлик бераётгани, ижара ҳуқуқининг кафолатлангани, экинларни жойлаштиришда тўлиқ мустақиллик ва аукционда қатнашиш ҳуқуқи мавжудлиги билан аҳамиятлидир.
Тошкент вилоятининг Ўрта Чирчиқ ва Янгийўл туманларида ер участкалари контурлар яхлитлиги ва суғориш тизимини бузмаган ҳолда 3 гектардан 50 гектаргача бўлган ўлчамларда “E-auksion” савдо платформасида электрон онлайн аукцион савдоларига чиқарилди.
[gallery-22009]
– Бу фармонга асосан ҳудудимизга деҳқончилик учун қулай, унумдор жойлар танлаб олинди, – дейди Ўрта Чирчиқ тумани Фермер, деҳқон ва томорқа эгалари кенгаши раиси Ағзам Арзиқулов. – Эътиборлиси, бу ерларни олганлар 49 йил давомида қишлоқ хўжалиги маҳсулотлари етиштириши мумкин. Ўз навбатида дала четида қишлоқ хўжалигига хизмат кўрсатувчи енгил конструкцияли музлатгичли омборхоналар, саралаш, қадоқлаш жойлари, сув тежовчи технологиялар, дала шийпони, техника парки каби объектларни жойлаштириш мумкин. Бундан ташқари, электрон онлайн аукцион савдоларида яшаш жойидан (юридик манзилидан), ташкилий-ҳуқуқий шаклидан, бошқа ер участкаси бор ёки йўқлигидан қатъий назар, барча жисмоний ва юридик шахслар, шу жумладан, чет эл инвестициялари иштирокидаги корхоналар иштирок этиши мумкин.
Мутахассислар маълумотига кўра, Ўрта Чирчиқ тумани “Дўстлик”, “Қорасув” ва “Роватак” МФЙлар ҳудудларидаги давлат захирасидаги қишлоқ хўжалиги ерлари аукцион савдоларга чиқарилган. Ўз навбатида бу йўналишда деҳқончилик қилишга талабгорлар ҳам кўпайган.
– Авваллари бундай тарзда ерлар очиқ аукционларга қўйилмаган эди, – дейди Халқ депутатлари Ўрта Чирчиқ тумани Кенгаши депутати Комила Жуманазарова. – Давлатимиз томонидан яратилган бундай имконият эса халқимизнинг даромадини янада ошириши, фаолиятини ривожлантиришига яхши имкониятдир. Бу орқали халқимизнинг озиқ-овқат хавфсизлигини таъминлашга ҳисса қўшилади, кўплаб иш ўринлари яратилади. Жойлардаги ишлаб чиқарувчи ва экспортёр корхоналар билан ҳамкорликлар йўлга қўйилади.
Бундан ташқари, Янгийўл тумани ҳокимлиги томонидан ҳам фермерлар, кластерлар, тадбиркорлар, инвесторлар, экспортёр ва қайта ишловчи корхоналар вакиллари билан мулоқотлар ўтказилди. Жараёнда Президентимиз фармони мазмун-моҳияти ҳақида тушунтириш берилмоқда. Ўтказиладиган аукцион савдоларга Янгийўл туманидан 786 гектар ер ажратилгани ва ундаги мавжуд қулайликлар ҳақида ахборот берилди.
<iframe width="650" height="420" src="https://www.youtube.com/embed/bxOiAYTu02M" title="Qishloq xo‘jaligi: yangi imkoniyatlardan umidlar katta" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>А.Мусаев, А.Алижонов (сурат, видео), ЎзА.