Қирғизистон айрим тоифадаги хорижликлар учун бир ҳафталик виза беради
Қирғизистон Ҳиндистон ва Хитойнинг айрим тоифадаги фуқаролари учун етти кунлик визасиз тартибни жорий қилди
Мамлакат ташқи сиёсат идорасидан маълум қилинишича, Қирғизистон Републикаси Вазирлар Маҳкамаси виза сиёсатини янада либераллаштириш мақсадида тегишли қарорни эълон қилган. Ҳужжатга мувофиқ, Ҳиндистон ва Хитойнинг АҚШ, Буюк Британия ва Шенген ҳудудига кирувчи давлатларга кўп марталик визаси бор фуқаролари Қирғизистонда етти кунгача визасиз юра олади.
Макао ва Гонконгда доимий яшайдиган шахслар Қирғизистонда бир ой давомида визасиз юриши мумкин, фақат уларнинг ёнида қайтиб кетиш учун чиптаси бўлиши лозим.
- Айни чоралар сайёҳлик оқимини рағбатлантириш ҳамда Қирғизистоннинг инвестициявий ва ишбилармонлик жозибадорлигини оширишга қаратилган, - таъкидланади ТИВ хабарида.