Қатар Миллий кутубхонаси ва Ахсикент археология парки ҳамкорлик қилади
Ишчи ташриф билан Доҳада бўлиб турган Наманган вилояти делегацияси Ўзбекистоннинг Қатардаги Фавқулодда ва мухтор элчиси Ашраф Хўжаев билан учрашди. Мулоқотда Ахсикент археология парки ва Қатар миллий кутубхонаси ўртасида илмий-амалий ҳамкорлик ўрнатиш, Шайх Файсал бин Қосим Ол Соний музейида экспозиция ташкил этиш, 65-Халқаро Гуллар фестивалига хорижий сайёҳларни кенг жалб этишда ушбу араб давлати етакчи тур операторлари билан ишлаш масалалари муҳокама қилинди. 2024 йил декабрь ойидаги ташрифда белгиланган режалар таҳлил этилиб, жараённи жадаллаштириш чоралари белгилаб олинди. Таъкидлаш жоиз, ўтган давр мобайнида элчихонамиз томонидан салмоқли иш олиб борилди. Қатар Миллий кутубхонаси бош директори Ҳусим Тан хоним ва Ахсикент археология парки директори Анвар Икром томонидан имзоланган Меморандум ўзаро тажриба алмашиш, биргаликда қўлёзмаларни сақлаш ва рақамлаштириш, қўшма маҳорат дарслари ташкил этишни назарда тутади.
– 2026 йил февралда Қатардан йирик делегация юртимизга боради, – деди элчи. – Бу ташриф дастуридан Наманган тадбирлари ҳам ўрин олади, албатта.
Учрашувда Қатар Миллий кутубхонаси Стратегик режалаштириш департаменти раҳбари Ҳабиб Феруз, Наманганнинг Араб давлатларидаги туризм элчиси Саййид Қосим Носир Қоруний ҳам иштирок этди.
Муҳаррама Пирматова, ЎзА
