Қашқадарё вилояти Нишон тумани “Гулистон” маҳалла фуқаролар йиғинига қарашли қарийб минг гектарга яқин бепоён кенгликда қурилаётган қуввати 500 МВт бўлган қуёш фотоэлектр станциясининг қурилиши жадал бормоқда.

Лойиҳа бўйича яқин кунларда қуёш фотоэлектр станциясининг биринчи босқичи - 200 мегаватт қувватини ишга тушириш мўлжалланмоқда.  

Хитой давлатидан келтирилган 100 мегаваттга тенг бўлган қуёш панеллари ва ускуналарни ўрнатиш ишлари босқичма-босқич амалга оширилмоқда. Режа амалга ошгач, бунинг натижасида тармоққа 42 миллион кВт/соат электр энергия етказиб берилади, дейди мутахассислар.  

Хитойнинг нуфузли компанияси томонидан инвестициявий қиймати 400 миллион доллар бўлган, 2023-2024 йилларда қуриб фойдаланишга топширилиши режалаштирилган, салкам 1000 гектар майдонда барпо этилаётган мазкур қуёш фото электр станциясида биринчи босқичда нимстанция қурилиши ишлари ҳам якунига етиш арафасида. Айни дамда ҳудудда 1 минг 700 нафарга яқин ишчи ходим режани ўз вақтида бажариш учун ҳаракат қилмоқда.  

– Компаниямиз мазкур лойиҳани 2024 йил якунига қадар тўлиқ ишга туширишни ўз олдига мақсад қилиб қўйган бўлиб, бунинг натижасида электр энергияси ишлаб чиқариш қуввати 500 мегаватга етиши кўзда тутилмоқда, – дейди корхона бош муҳандиси Ли Хуихианг. – Албатта, бу келгусида мамлакатингизнинг яшил энергетика билан таъминланишига, энг муҳими, мавжуд ресурслар иқтисод қилинишига замин яратади. Бизнинг компаниямиз учун бу юртингиздаги илк йирик лойиҳа. Келгусида мазкур йўналишдаги ҳамкорликни яна давом эттиришга тайёрмиз.  

Станцияда ишлаб чиқарилган электр энергияни ягона энергетика тизимига улаш учун “Ўзбекистон МЭТ” АЖ маблағлари ҳисобидан 3 та  узунлиги 36 километр бўлган 220 кВ кучланишли электр узатиш тармоғини қуриш ишлари ҳам охирлаб қолган.  

Мазкур лойиҳанинг амалиётга татбиқ этилиши бугунги кунда долзарб муаммолардан бири бўлган аҳолини барқарор электр энергияси билан таъминлашга хизмат қилади.  

Ўлмас Баротов, ЎзА мухбири