Ўзбек халқининг, қолаверса кўп миллионли футбол мухлисларининг узоқ йиллик орзуси ушалди.
Аниқроқ айтадиган бўлсак, куни кеча Осиё қитъасида футбол бўйича Жаҳон чемпионати 3-саралаш босқичининг 9-турида Ўзбекистон терма жамоаси БАА термасига қарши 0:0 ҳисобида дуранг натижани қайд этди. Бу билан терма жамоамизнинг очколари 18 тага етиб, мамлакат тарихида илк маротаба Жаҳон чемпионати йўлланмасини қўлга киритди. Бу ғалаба барча юртдошларимизни беҳад қувонтирди. Бугун халқимиз чин қалбдан футболчиларимиз билан фахрланмоқда.
Футболимиз тарихида янги саҳифа очган Темур Кападзе бошчилигидаги терма жамоамиз аъзоларини Ислом Каримов номидаги Тошкент халқаро аэропортида ҳукумат аъзолари, спортимиз мутасаддилари, ота-оналар, мураббийлар, кенг жамоатчилик вакиллари, соҳа фидойилари тантанали кутиб олди.
Узоқ кутилган дақиқалар ўз якунига етиб, юзлари ёруғ, бошларини мағрур тутган футболчиларимиз кўрина бошлади.
[gallery-23799]
– Бу кунни ўзим ҳам футболчи, ҳам мураббий сифатида кўп кутганман, – дейди Ўзбекистон миллий терма жамоаси бош мураббийи Темур Кападзе. – Албатта, бу ғалабаларимиз замирида аввало халқимизнинг ишончи ва дуоси ётибди. Куни кеча Президентимиз Шавкат Мирзиёев жамоамиз аъзоларини телефон орқали табриклаганлари бизни жуда қувонтирди. Бизга йўллаган табрикларида “Ҳеч шубҳасиз, миллий спортимиз солномасига олтин ҳарфлар билан битиладиган бундай ёрқин натижа юртимиздаги миллионлаб футбол мухлислари, бутун халқимизнинг неча йиллик орзуси эди” деган сўзлари ўзим каби барча жамоамиз аъзоларини руҳлантирди. Халқимизнинг энг буюк орзуларидан бирини рўёбга чиқарганимиздан хурсандмиз. Энди бизнинг масъулиятимиз янада ошади ва 2026 йилги Жаҳон чемпионатида ҳам муносиб иштирок этишга бор куч-ғайратимизни сарфлаймиз.
Албатта, бу муваффақият мамлакатимизда сўнгги йилларда спорт соҳаси, хусусан, ўзбек футболига қаратилаётган эътиборнинг амалдаги ифодасидир. Футболни оммалаштириш, ёш авлод орасида спортга қизиқишни ошириш, халқаро мусобақаларда муносиб иштирок этадиган терма жамоаларни шакллантириш мақсадида тизимли ишлар амалга оширилди.
– Ўтган йили Олимпия терма жамоамиз сафида “Париж-2024” Олимпия ўйинларига йўлланмани қўлга киритган ҳолда тарихий натижа қайд этган бўлсак, бу йил миллий терма жамоамиз таркибида Жаҳон чемпионатига йўл олдик ва халқимизнинг азалий орзусини амалга оширдик, – дейди Ўзбекистон миллий терма жамоаси аъзоси Аббосбек Файзуллаев. – Халқимизнинг неча йиллик орзуси ушалди. Бунга маълум маънода ўз ҳиссамни қўшганимдан мамнунман. Мамлакатимизда спортчиларга яратиб берилаётган кенг имкониятлар ва биз, ёшларга қаратилган улкан эътибор натижасида улкан марраларни забт этмоқдамиз. Бунинг учун Президентимиз ва халқимизга ўз миннатдорчилигимизни билдирамиз.
Футбол бўйича Осиё қитъасида Жаҳон чемпионати 3-саралаш босқичининг 9-тур учрашувлари якунига кўра, “А” гуруҳидаги вазият анча ойдинлашди. Гуруҳда Эрон 20 очко билан биринчи ўринда бораётган бўлса, Ўзбекистон термаси 18 очко жамғариб, иккинчи ўринни эгаллади. Мазкур терма жамоалар муддатидан аввал Жаҳон чемпионати йўлланмасини қўлга киритди. БАА термаси 14 очко билан учинчи ўринда қолди. Қатар 13 очко билан 4-ўринни мустаҳкамлади. Қирғизистон 7, КХДР 3 очко билан кейинги поғонадан ўрин олди.
Энди 10 июнь куни Ўзбекистон – Қатар, Қирғизистон – БАА ва Эрон – КХДР терма жамоалари сўнгги тур учрашувларини ўтказади.
Эслатиб ўтамиз, 2026 йилда АҚШ, Канада ва Мексика мамлакатларида бўлиб ўтадиган футбол бўйича Жаҳон чемпионатида 48 та жамоа иштирок этиши белгиланган. Қитъамизга тўғридан-тўғри 8 та, қитъалараро плей-офф ўйинлари орқали эса битта ўрин ажратилган.
Осиё қитъаси учун Жаҳон чемпионатининг 3-саралаш босқичида 18 та жамоа учта гуруҳга бўлинди ва улар давра тизимида (уй-сафар) баҳслашмоқда. Ҳар бир гуруҳдан энг яхши иккита ўринни эгаллаган терма жамоа 2026 йилги Жаҳон чемпионатига тўғридан-тўғри йўлланма олади.
Осиё саралаш гуруҳларида учинчи ва тўртинчи ўринларни эгаллаган 6 та терма жамоа якуний босқичда ҳар бири уч жамоадан иборат иккита гуруҳга бўлинган ҳолда давра форматида кураш олиб боради.
Осиё плей-офф босқичида энг яхши икки ўринни эгаллаган жамоалар «ЖЧ-2026» йўлланмасига эга бўлади. Ҳар икки гуруҳда иккинчи ўринни эгаллаган жамоалар қитъалараро плей-оффда ОФК номидан иштирок этадиган жамоани аниқлаш учун ўзаро ўйин ўтказади.
Тадбирда Ўзбекистон Республикаси Бош вазири А.Арипов иштирок этди.
Тўлқин РЎЗИЕВ, Жавоҳир ТОШХЎЖАЕВ, ЎзА мухбирлари