Покистон Суданга ҳарбий самолётлар етказиб бериш бўйича келишувни вақтинча тўхтатди
Покистон Суданга қурол ва ҳарбий самолётлар етказиб бериш бўйича 1,5 миллиард долларлик келишувни вақтинча тўхтатди. Манбаларга кўра, бу қарор Саудия Арабистонининг босими ортидан қабул қилинган, чунки Aр-Риёд молиялаштиришдан воз кечиб, битимни бекор қилишни талаб қилган.
Судан бугунги кунда оғир гуманитар инқирозни бошдан кечирмоқда. Мамлакатда армия ва тезкор қўллаб-қувватлаш кучлари ўртасидаги тўқнашувлар уч йилдан бери давом этмоқда ва бу можаро ташқи кучлар манфаатлари тўқнашувига айланган. Шу сабаб ҳарбий келишувлар минтақадаги вазиятга жиддий таъсир кўрсатиши мумкин.
Айрим хорижий нашрлар ёзишича, Саудия Арабистони дастлаб мазкур келишувни қўллаб-қувватлаган, аммо кейинчалик ўз позициясини ўзгартирган. Бунга айрим ғарб давлатларининг Африкадаги билвосита урушлардан четда туриш ҳақидаги тавсиялари сабаб бўлгани айтилмоқда. Aр-Риёд ва БААнинг Суданда турли томонларни қўллаб-қувватлаши эса вазиятни янада мураккаблаштирмоқда.
Айни пайтда Покистоннинг бошқа ҳарбий экспорт келишувлари ҳам хавф остида қолган. Хусусан, Ливия билан режалаштирилган йирик битим тақдири ҳам қайта кўриб чиқилаётгани хабар қилинмоқда. Экспертлар фикрича, бу ҳолат Саудия Арабистони минтақадаги стратегиясини қайта баҳолаётганини кўрсатмоқда.
Мусулмон Зиё, ЎзА
