Чиноз туманида Вьетнам, Хитой тажрибаси бўйича “Ипак қуртини уч ёшгача боқиб тарқатишнинг афзалликлари” мавзусидаги илмий-амалий семинар ўтказилди.

Унда Ўзбекистон Республикаси Бош вазирининг ўринбосари Зулайҳо Маҳкамова, Тошкент вилояти ҳокими Зойир Мирзаев, Камбағалликни қисқартириш ва бандлик вазири ўринбосари Раъно Турдибоева, Ипакчилик илмий-тадқиқот институти олимлари, юртимизнинг барча ҳудудларидаги хотин-қизлар бандлигига масъул мутахассислар, фермерлар, кластерлар ва пиллани қайта ишловчи корхоналар раҳбарлари қатнашди. 

Дастлаб семинар қатнашчиларига “Бирлик” маҳалла фуқаролар йиғинида жойлашган ипак қуртини жонлантириш ва уч ёшгача боқиш маскани кўрсатилди. Мазкур мажмуада пилла қурти хитой тажрибаси асосида боқилиб, жойлардаги маҳаллаларда аҳолига тарқатилади. Бунинг учун бино зарур бўлган барча жиҳозлар билан таъминланган. 

Мутахассисларнинг таъкидлашича, мамлакатимиз ҳозир дунёда пилла етиштириш бўйича учинчи ўринда туради. Мавсумда бир қути ипак қурти уруғидан ўртача 60 килограмм пилла ҳосили олишга эришмоқда. Ўзбекистоннинг географик жойлашуви айни пайтда ипак қурти етиштириш учун қулай экологик ҳудуд ҳисобланиб, ҳар йили 450-500 минг қутидан зиёд ипак қурти парваришланмоқда. 

Бу йил биргина Чиноз туманида 3 минг 25 қути боқилади ва ундан жами 181 тонна пилла етиштириш режалаштирилган. Шуни эътиборга олиб, ҳозир пиллакорлар юқори намликда ипак қуртини боқиш технологиясига ўтмоқда. Иштирокчиларга ипак қурти уруғини жонлантириш ва қуртларни кичик ёшларида, марказлаштирилган ҳолда қуртхоналарда боқишнинг афзалликлари ҳақида айтилди. 

Шундан сўнг амалий семинар туманнинг Гулзоробод ҳудудида давом этди. Унда масъуллар томонидан пиллачилик соҳасида амалга оширилган ишлар самарадорлиги ҳамда 2025 йилда белгилаб олинган устувор вазифалар ҳақида сўз юритилди. 

– Тошкент вилоятида фермер хўжаликлари ва тутзорларга бириктирилган касаначилар билан пилла хомашёсини етиштириш бўйича шартнома тузиш ишлари тўлиқ якунланган, – дейди “Тошкент агро пилла” МЧЖ раҳбари Р. Мейлиев. – Ҳозирги кунда 137 та инкубаториялар мавсумга тайёр ҳолатга келтирилган, мавсумга керак бўладиган жиҳозлар захираси тўлиқ яратилган. Шу билан бирга, 9 та пиллачилик кластерлари томонидан хориждан келтириладиган 23 минг 266 қути ипак қурти уруғига Хитой давлати корхоналари билан шартнома қилинди. 

Ҳозирда Хитой давлатидан уруғ келиши кутилмоқда. Кутилаётган ҳаво ҳароратига қараб, 29 мартдан 5 апрелгача жойлардаги инкубаторияларга ипак қурти уруғларини қуйиш режалаштирилган. 

<iframe width="640" height="420" src="https://www.youtube.com/embed/HzP1JNd4pWA" title="Pilla yetishtirishda xorij tajribasi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

А.Мусаев (сурат, видео), ЎзА.