Наманган вилояти ҳокимлигида “Peng sheng agrotech” компанияси директори Сонг Ше Жие бошчилигидаги делегация билан ўтказилган учрашувда ҳудудларда бўш турган қишлоқ хўжалигига мўлжалланган ерларда томчилатиб суғориш технологиясини жорий этиш масалалари муҳокама қилинди.

Мулоқотда айтиб ўтилганидек, “Peng sheng” Ўзбекистон-Хитой қўшма корхонаси томонидан Сирдарё ва Қашқадарё вилоятларида пахтачиликда хорижнинг илғор технологияси уч йилдан буён синовдан ўтказилиб, яхши натижаларни бермоқда.  

Қайд этиш жоиз, мазкур замонавий технология бир вақтнинг ўзида чигитни бехато экади, томчилатиб суғориш учун елим қувурларни жойлаштириб кетади. Қудратли насослар бир вақтнинг ўзида 150 гектар ерни суғоришга имкон яратади. Натижада вақт ва пул тежалиб, даромад ҳам шунга монанд кўпаяди.

Наманган вилоят ҳокими Шавкатжон Абдураззоқов қишлоқ хўжалиги соҳасидаги мавжуд имкониятлар ҳақида инвесторларга батафсил тушунтириш берди.  

Қайд этилганидек, “Ўзбекистон-2030” стратегиясидаги беш устувор йўналишнинг учинчиси сифатида сув ресурсларини тежаш ва атроф-муҳит муҳофазаси  масаласи  белгиланган бўлиб, 2030 йилгача сув тежовчи технологияларни 4,3 миллион гектарда қўллаш режалаштирилган. Ўз навбатида, меҳмонлар Хитой технологияси афзалликлари, ҳосилдорлик ўртача 60 центнерни ташкил этиши, уни етиштиришдан тортиб, қайта ишлашгача бўлган тизим яратилганлигини билдирди.

Музокаралар якунида, хорижлик сармоядорлар жами 5 минг гектар майдонда сўнгги технологияни қўллаш учун Поп, Мингбулоқ ва Наманган туманларидаги мавжуд яйлов ерларни ўрганишга келишиб олинди.

Оқилхон Дадабоев, ЎзА.