Бу ҳақда мазкур ташкилот ахборот хизмати хабар берди. Унда маълум қилинишича,  “S&P Global Ratings” халқаро агентлиги “Ўзбекнефтгаз” акциядорлик жамиятининг кредит рейтинги бўйича прогнозини “Барқарор”дан “Ижобий”га ўзгартирган. Шунингдек, компаниянинг узоқ муддатли кредит рейтинги “B+” даражасида тасдиқланган.

Бу қарор 2025 йил 23 май куни Ўзбекистон Республикасининг суверен кредит рейтингига берилган ижобий прогноз фонида қабул қилинган. 

Таъкидлаш керакки, “Ўзбекнефтгаз” АЖ мамлакат иқтисодиётида стратегик аҳамиятга эга бўлиб, республикада қазиб олинадиган табиий газнинг тахминан 60 фоизини таъминлайди. Компания газни ички бозорга ижтимоий нархларда етказиб бериш орқали саноатни ривожлантириш ва энергетика соҳасида барқарорликни мустаҳкамлашга ҳисса қўшиб келмоқда. 

Жамият маҳаллий газ асосида “GTL” заводида синтетик ёқилғи ва бошқа қайта ишланган маҳсулотларни ишлаб чиқаришни йўлга қўйган. Шу билан бирга, “Ўзбекнефтгаз” АЖ ва унинг таркибига кирувчи корхоналар мамлакатдаги энг йирик солиқ тўловчилар ҳамдир. 

Компания акцияларининг деярли 100 фоизи давлатга тегишли бўлиб, кузатув кенгашида ҳам давлатнинг салмоқли иштироки мавжуд. Ўтган йиллар давомида компания давлат томонидан имтиёзли шартларда ва кафолатлар асосида молиявий қўллаб-қувватловга эга бўлган.

Мазкур халқаро агентлик томонидан берилган ижобий прогноз келгусида “Ўзбекнефтгаз” АЖнинг рейтинги янада ошиши эҳтимолини англатади.

Н. Зиёдуллаева, ЎзА