Марказий банк маълумотларига кўра, Ўзбекистоннинг расмий захира активлари 1 сентябрь ҳолатига 39,15 млрд. долларни (+4,7 фоиз) ташкил этиб, август ойи давомида 1,75 млрд. долларга ошган.

Бу статистика юритилган бутун давр учун навбатдаги рекорд кўрсаткичдир.

Регулятор маълумотларига кўра, ўтган ойда хорижий валютадаги захиралар 503,1 млн. долларга – 7,69 млрд. доллардан 8,19 млрд. долларгача ошган (июнь-июль ойларида олтин сотиб олиш ҳисобига 1,58 млрд. долларга камайиш кузатилган).

Шунга қарамай, йил бошидан буён (январь-август) валюта захиралари 1,18 миллиард долларга қисқарди, шу жумладан, 2019 йилда мамлакат чиқарган 500 миллион долларлик суверен еврооблигациялар бўйича қарзни тўлаш ҳисобига.

Захиралардаги олтиннинг физик ҳажми июнь-июль ойларидаги ўсишдан сўнг (18,94 тонна) 10 минг троя унцияга (311 кг.) камайиб, 12,04 миллион троя унцияни (371,7 тонна) ташкил этди.

Шунга қарамай, олтин захирасининг қиймати яна 1,24 миллиард долларга – 29,16 миллиард доллардан 30,4 миллиард долларгача ошди. Бу 2013 йилдан бери статистика юритилган барча вақтлар учун рекорддир. Бунинг сабаби: август ойида олтин котировкаси бир унция учун 2446,28 доллардан 2502,77 долларга (+2,3 фоиз) кўтарилди.

Умуман олганда, йил бошидан буён Марказий банкнинг олтин захиралари қиймати 5,77 млрд. долларга ошди.

Захираларда, шунингдек, 35,48 миллион долларлик АҚШ ғазна облигациялари ҳам мавжуд. Илгари Марказий банк олтин-валюта захираларини диверсификация қилишга киришгани ва чет эл давлатларининг қимматли қоғозларини харид қила бошлаганини маълум қилганди.

Захираларнинг ўсишига қарамай, у 12 ойлик импортни қоплашга етади (илгари 20 ой эди).

Шуни таъкидлаш лозимки, Марказий банк ўз захираларида амалда давлат бюджетининг бир қисмига айланган Ўзбекистон Тикланиш ва тараққиёт жамғармаси маблағларини ҳам кўрсатади. Бу жамғарманинг ҳажми ошкор қилинмайди. S&P Global Ratings халқаро рейтинг агентлиги илгари Тикланиш ва тараққиёт жамғармаси маблағларини Марказий банк захираларидан чиқариб ташлаётганини маълум қилганди. Чунки жамғарма маблағлари асосан пул-кредит ёки тўлов эҳтиёжлари учун эмас, балки фискал мақсадлар учун мўлжалланган.

Ҳисоб-китобларга кўра, олтин нархининг тушиши кутилаётгани ва жорий ҳисоб рақамининг тақчиллиги давом этаётгани сабабли Ўзбекистоннинг фойдаланиш мумкин бўлган валюта захиралари 2027 йилгача қисқаради. Марказий банкнинг монетар олтин захиралари олтин-валюта захиралари умумий ҳажмининг 80 фоиздан ортиғини ташкил этади. Марказий банк Ўзбекистонда қазиб олинаётган олтинни сотиб олишда устувор ҳуқуққа эга. У олтинни маҳаллий валютада сотиб олади, кейин эса интервенциясининг ўзбек сўмига таъсирини қоплаш учун долларни маҳаллий бозорда сотади.

Ш.Маматуропова,

ЎзА