Ўзбекистонлик спортчилардан жаҳон рекорди ва қўш олтин!
Японияда давом этаётган ХХ Осиё ўйинларининг 29 сентябрь кунги беллашувлари якунига кўра, Ўзбекистон делегацияси ҳисобига 2 та олтин ва 1 та бронза медаль қўшилди.
Ўзбекистон делегацияси вакиллари бугун камондан отиш, киберспорт, ўқ отиш, слаломда эшкак эшиш, велотрек, сувга сакраш, оғир атлетика, волейбол, теннис, бокс ва енгил атлетика спорт турларида иштирок этди.
Кун давомида спортчиларимиз бир қатор муҳим натижаларни қайд этди. Жумладан, оғир атлетика ва енгил атлетикада икки нафар вакилимиз олтин медалга сазовор бўлган бўлса, боксда яна икки спортчимиз финал йўлланмасини қўлга киритди.
Аниқроқ айтадиган бўлсак, оғир атлетика бўйича эркаклар ўртасида 110 килограмм вазн тоифасида иштирок этган ҳамюртимиз Акбар Жўраев даст кўтаришда дастлаб 190 кг. оғирликни ўзига бўйсундириб, Осиё ўйинлари рекордини янгилаган бўлса, учинчи уринишда 197 кг. натижа қайд этиб, жаҳон рекордини янгилади. Шунингдек, силтаб кўтаришда 226 килограмм натижа қайд этди. Иккикураш якунига кўра 423 килограмм натижа қайд этган ҳамюртимиз Осиё ўйинлари ғолибига айланди.
Енгил атлетика бўйича аёллар ўртасида баландликка сакраш баҳсларида юртимиз шарафини ҳимоя қилган Барнохон Сайфуллаева 1 метр 90 сантиметр натижа қайд этиб, Осиё ўйинлари ғолибига айланди.
Шу тариқа, мазкур йўналишда Ўзбекистон вакилларининг Осиё ўйинларидаги ғолиблик анъанаси давом этди. Аввалги тўрт мусобақада ҳам юртдошларимиз чемпионликни қўлга киритган:
2010 йил — Светлана Радзивил;
2014 йил — Светлана Радзивил;
2018 йил — Светлана Радзивил;
2022 йил — Сафина Садуллаева;
2026 йил — Барнохон Сайфуллаева.
Барнохон Сайфуллаеванинг ғалабаси Ўзбекистоннинг мазкур йўналишдаги кетма-кет бешинчи чемпионлигини таъминлади.
Осиё ўйинларининг бокс бўйича ярим финал баҳсларида ҳам вакилларимиз муносиб иштирок этди. Жумладан, +90 килограмм вазн тоифасида рингга кўтарилган Жаҳонгир Зокиров эронлик Амир Эсмаилига қарши жанг ўтказиб, рақибини иккинчи раундда техник нокаутга учратди ва финал йўлланмасини қўлга киритди.
–60 килограмм вазн тоифасидаги вакилимиз Абдумалик Халаков ҳам финал йўлланмасига эга бўлди. У мезбонлар вакили Шунсуке Китамотога қарши кечган баҳсда 4:1 ҳисобида ғалаба қозонди. Афсуски, –80 килограмм вазн тоифасида иштирок этган Фазлиддин Эркинбоев ярим финалда ҳиндистонлик Анкушга имкониятни бой берди ва мусобақани бронза медали билан якунлади.
[gallery-31682]
https://uza.uz/uz/collection/31682
Эртага, 30 сентябрь куни бокс бўйича яна тўрт нафар спортчимиз финал йўлланмаси учун рингга кўтарилади:
–51 кг: Феруза Казакова — Ву Ю (Хитой);
–60 кг: Ситора Турдибекова — Лин Ю-Тинг (Хитой Тайпейи);
–70 кг: Шавкатжон Болтаев — Торехан Сабирхан (Қозоғистон);
–90 кг: Тўрабек Ҳабибуллаев — Капил Покҳария (Ҳиндистон).
Теннис баҳсларида ҳамюртимиз Ҳумоюн Султонов хитойлик рақибини 6:1, 6:4 ҳисобида мағлуб этиб, мусобақанинг учинчи босқичига йўл олди.
Шу тариқа, 29 сентябрь кунги баҳслардан сўнг Ўзбекистон делегацияси ҳисобидаги медаллар сони 14 та олтин, 17 та кумуш ва 14 та бронза — жами 45 тага етди.
Медаллар жамғариш бўйича Хитой 143 та олтин, 62 та кумуш ва 49 та бронза, жами 254 та медаль билан пешқадамлик қилмоқда. Япония 47 та олтин, 71 та кумуш ва 65 та бронза, Жанубий Корея эса 24 та олтин, 27 та кумуш ва 44 та бронза медалга эга бўлиб кучли учликни якунламоқда.
Жавоҳир Тошхўжаев,
Сарвар Ўрмонов (сурат) Япония ЎзА
