Автомобиль йўллари қўмитасида Саудия Арабистонининг “AL BAWAN” йирик қурилиш компанияси ҳамда “SAJCO” компанияси мутасаддиларидан иборат делегация аъзолари билан учрашув бўлиб ўтди.

Учрашувда Ўзбекистон билан ҳамкорлик қилиш истагида бўлган хорижий компания вакиллари ўз фаолият йўналиши ҳақида маълумот берди. 

Қайд этиш лозимки, йўл қурилиши соҳасида фаолият олиб борувчи ҳар иккала компания молия, йўл қурилишини лойиҳалаштириш, асбоб-ускуналар ишлаб чиқариш, сув тўғонлари, касалхона ва аэропорт қурилиши каби бир қанча йўналишлар бўйича халқаро лойиҳаларни амалга ошириб келмоқда. 

Хусусан, Саудия Арабистонининг “AL BAWAN” йирик қурилиш компанияси ўз фаолиятини 1991 йилдан бошлаган. 250 дан ортиқ катта лойиҳаларни амалга оширган, 10 мингдан ортиқ ишчига эга компания ҳисобланади. 

Автомобиль йўллари қўмитасига ташрифнинг асосий мақсади “Тошкент — Термиз” йўналишидаги М39 автомобиль йўлининг умумий узунлиги 38 км бўлган “Сирдарё — Бахт” айланма йўлини қуриш бўйича музокаралар олиб боришдан иборат бўлиб, ҳар икки томон ушбу лойиҳани амалга ошириш бўйича ўз таклиф ва фикрларини ўртага ташлади. 

Мулоқот жараёнида ушбу лойиҳани амалга ошириш учун маҳаллий инфратузилмани ўрганиш ҳамда йўлнинг неча тасмали бўлиши ва тезлик миқдорини белгилаш муҳим экани таъкидланди. 

Саудия Арабистонининг “AL BAWAN” йирик қурилиш компанияси ҳамда “SAJCO” компанияси мутасаддилари Сирдарё вилоятига жўнаб кетди. Сирдарёга ташриф давомида “Тошкент — Термиз” йўналишидаги М39 автомобиль йўлининг умумий узунлиги 38 км бўлган “Сирдарё — Бахт” айланма йўлини қуриш учун маҳаллий инфратузилма ўрганилди. Маҳаллий мутахассислар томонидан йўл инфратузилмаси бўйича батафсил маълумот берилди. 

Муҳайё Тошқораева, ЎзА