Мамлакатимизда илк марта “Йилнинг энг яхши ҳуқуқ ўқитувчилари” кўрик - танлови ўтказилди.

Адлия вазирлигидан хабар беришларича, танловда республика бўйича 10 мингга яқин "Давлат ва ҳуқуқ асослари" фани ўқитувчиси қатнашди.

Республика босқичида иштирок этган 42 нафар ўқитувчидан 3 нафари кўрик танлов ғолиби бўлди.  

Танловда “Энг яхши нотиқ” ва “Энг яхши тақдимот” номинациялари бўйича 3 нафардан пешқадамлар ҳам аниқланди.  

Танловда биринчи ўринни Самарқанд вилояти Жомбой тумани 28-мактаб ўқитувчиси Дилобар Одилова эгаллади ва диплом, 30 миллион сўм пул мукофотини қўлга киритди.  

Иккинчи ўрин эгаси Бухоро вилояти Қоровулбозор тумани 1-мактаб ўқитувчиси Меҳринисо Норовага диплом ва 20 миллион сўм, учинчи ўринни олган Қорақалпоғистон Республикаси Шуманай тумани 16-мактаб ўқитувчиси Азат Баймуратовга диплом ва 10 миллион сўм пул мукофоти берилди.  

Танловнинг бошқа совриндорлари ҳам муносиб тақдирланди.

Н.Абдураимова, ЎзА