Россия Федерациясининг Тюмен шаҳрида дзюдо бўйича клублар ўртасида ўтказилган Континентал Лига мусобақасининг "Шарқ" дивизиони баҳсларида ўзбекистонлик қозоғистонлик ва тожикистонлик дзюдочилардан иборат "Jenys" жамоаси муваффақиятга эришди.
Мусобақанинг учинчи босқич доирасидаги ушбу дивизионнинг “А” гуруҳида Лиганинг ўтган йилги ғолиби Россиянинг "Урал-Западная Сибир", "Родина", "Тюмен-дзюдо-2", “Б” гуруҳида "Jenys", "Тюмен-дзюдо" ва "Триумф" дзюдо клублари ғолиблик учун кураш олиб борди.
Гуруҳнинг барча учрашувларида Ўзбекистон терма жамоаси аъзолари Артём Штурбабин, Шаҳрам Аҳадов ва Париж-2024 Олимпиадаси совриндори Музаффарбек Тўрабоев жой олган "Jenys" жамоаси устунликни қўлга киритди.
Улар 1/2 финалда "Урал-Запад Сибир" жамоасини 3:2 ҳисобида доғда қолдирди. Иккинчи 1/2 финалда "Тюмен-дзюдо" худди шу ҳисобда "Родина" жамоасидан устун келди. Ҳал қилувчи учрашувда "Jenys" "Тюмен-дзюдо" клубини 3:1 ҳисобида мағлуб этиб, "Шарқ" дивизиони ғолиблигини тантана қилди.
Континентал Лиганинг финал босқичи жорий йилнинг 1 ноябрь куни Россия Федерацияси пойтахти Москва шаҳрида ташкил этилади.
Т. Рўзиев, ЎзА