Иордания Ҳошимийлар Қироллигининг “Ammonnews” нашрида Ўзбекистон Республикаси Президенти Шавкат Мирзиёев Нью-Йорк шаҳрига ташрифи ишбилармонлик дастури доирасида Америка етакчи компаниялари, инвестиция жамғармалари ва молиявий институтлари раҳбарлари билан учрашиб, давра суҳбати ўтказганини ёритди.

Мақолада тадбирлар АҚШ Президентининг Жанубий ва Марказий Осиё бўйича махсус вакили Сержио Гор, глобал шериклик бўйича махсус вакили Паоло Замполли, савдо вазири ўринбосари Уильям Киммитт, Америка-Ўзбекистон савдо палатаси раиси Кэролин Лэмм, шунингдек “Franklin Templeton”, “Citigroup”, “BNY Mellon”, “NASDAQ”, “Boeing”, “Mastercard”, “Visa”, “General Motors”, “Nvidia”, “Oppenheimer”, “Jefferies”, “Air Products”, “Traxys”, “FLSmidth”, “GoGreen Partners”, “Cleveland Clinic”, “Cargill” каби компаниялар топ-менежерлари ҳамда Ўзбекистоннинг йирик компаниялари раҳбарлари иштирокида кечгани таъкидланган.

–Халқаро валюта жамғармаси вакили Кристалина Георгиева Ўзбекистонда олиб борилаётган “ортга қайтмас” ислоҳотларни юқори баҳолаб, техник кўмак кучайтирилишини таъкидлади, – дейилган жумладан мақолада. – Жаҳон банки вакили Ажайи Банга ҳам республикадаги изчил саъй-ҳаракатларни эътироф этиб, банкнинг 14 миллиард долларлик лойиҳа портфелига алоҳида тўхталиб ўтган.

Муаллиф давлатимиз раҳбари сўзи аввалида Президент Дональд Трамп билан яқинда бўлиб ўтган мулоқотда иқтисодий ҳамкорликни кенгайтириш ва узоқ муддатли истиқболга мўлжалланган салмоқли лойиҳалар портфелини шакллантиришга келишиб олингани таъкидлаган. Шу муносабат билан мазкур учрашув ушбу вазифаларни бажаришда алоҳида аҳамиятга эга экани қайд этилган.

Муҳаррама Пирматова, ЎзА