Президентимизнинг Бирлашган Миллатлар Ташкилоти Бош Ассамблеяси минбаридан сўзлаган нутқи Ўзбекистоннинг халқаро сиёсатидаги муҳим воқеалардан бири бўлди.

Сенатнинг Бюджет ва иқтисодий масалалар қўмитаси раиси ўринбосари Қобил Турсунов шу ҳақда муносабат билдирди: 

– БМТдаги Президентимиз чиқишидан кейин Ўзбекистон ўз ташаббуслари билан халқаро ҳамжамият олдида масъулиятли давлат сифатида намоён бўлди.

Давлатимиз раҳбари иқлим ўзгариши, экологик хавфлар, инсон ҳуқуқлари ва тенглик масалаларига жиддий эътибор қаратди. Хусусан, Орол денгизи фожиаси ва унинг оқибатларини бартараф этиш масаласининг қайта-қайта кун тартибига олиб чиқиши нафақат экологик, балки ижтимоий ва иқтисодий нуқтаи назардан ҳам долзарбдир. Бу ташаббуслар БМТ доирасида жуда муҳим аҳамият касб этади. 

Президентимиз минтақавий ҳамкорлик масалаларига алоҳида тўхталиб ўтди. Афғонистондаги барқарорлик бутун Марказий Осиё учун муҳим экани таъкидланди. Афғонистон орқали янги транспорт ва энергетика йўлакларини яратиш таклифи,  геостратегик жиҳатдан улкан аҳамиятга эга.

Бу, нафақат иқтисодий интеграцияни кучайтиради, балки минтақада тинчлик ва ҳамжиҳатликни таъминлашга хизмат қилади. Давлатимиз раҳбари Ўзбекистон халқаро иқтисодий тизимга янада чуқур интеграция қилиниши зарурлигини таъкидлади. 

Халқаро валюта жамғармаси, Жаҳон савдо ташкилоти ва бошқа нуфузли ташкилотлар билан ҳамкорлик масаласига урғу берилиши мамлакатнинг ички ислоҳотлари жаҳон стандартлари билан уйғунлаштирилаётганидан далолат беради. Бу эса, иқтисодий барқарорлик ва инвестициявий муҳитни янада кучайтиришга хизмат қилади.

Шуни алоҳида таъкидлаш керакки, Президентимиз  ўз нутқида айтилган фикрлар фақат дипломатик баёнот эмас, балки амалий қадамлар учун дастуриламал ҳисобланади. Агар ушбу ташаббуслар ҳаётга татбиқ этилса, Ўзбекистон минтақавий сиёсатда етакчи, халқаро майдонда эса ишончли шерик сифатида янада мустаҳкамланади.

Президентмизнинг нутқи мамлакатимиз ташқи сиёсатининг очиқлиги, масъулияти ва дунё ҳамжамияти билан чуқур ҳамкорликка тайёрлигини яна бир бор яққол намоён қилди. Шу боисдан ҳам ушбу нутқ нафақат тарихий, балки стратегик аҳамиятга эга муҳим ҳужжат сифатида баҳоланмоқда.

<iframe width="640" height="420" src="https://www.youtube.com/embed/ksGuN4FaBag" title="O‘zbekiston mintaqaviy siyosatda yetakchi, xalqaro maydonda ishonchli sherik sifatida namoyon bo‘ldi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe> 

Н.Абдураимова,

Ё.Мелибоев(видео), ЎзА