“Ўзбекгидроэнерго” очиқлик рейтингида биринчи ўринни эгаллади
Бу ҳақда жамият ахборот хизмати хабар берди. Унда маълум қилинишича, бугун Коррупцияга қарши курашиш агентлиги томонидан давлат органлари ва ташкилотларида очиқликни таъминлаш борасида 2025 йил давомида амалга оширилган ишлар таҳлили ўтказилган.
Шунингдек, “Очиқлик индекси”нинг якуний натижалари эълон қилиниб, давлат идоралари фаолиятига берилган баҳолар кенг жамоатчиликка тақдим этилган.
2025 йил якунларига кўра, “Ўзбекгидроэнерго” акциядорлик жамияти очиқлик ва шаффофликни таъминлаш борасида энг юқори натижани қайд этиб, рейтингда биринчи ўринни эгаллади. Жамият фаолияти 94,4 балл билан баҳолангани унинг мазкур йўналишда изчил ва самарали иш олиб бораётганини кўрсатади.
Қайд этилишича, ушбу натижа ахборотдан эркин фойдаланишни таъминлаш, жамоатчиликка тезкор ва ишончли маълумот тақдим этиш, шунингдек, замонавий бошқарув ҳамда очиқлик тамойилларини кенг жорий этиш бўйича амалга оширилаётган чора-тадбирлар самараси ҳисобланади.
Н.Зиёдуллаева, ЎзА
