Баҳрайн давлатида поёнига етган III Осиё ёшлар ўйинлари жаҳон спорт оламига ўзига хос натижаларни туҳфа этиши билан бирга Ўзбекистон спорт тарихига янгича муждаларни тортиқ этди.
Мамлакатимиз вакиллари илк бор 37 та олтин, 16 та кумуш, 28 та бронза, жами 81 та медаль билан Осиё ўйинлари тарихида умумжамоа ҳисобида 2-ўринни эгаллаш билан бир қаторда янгича кўрсаткичларни намойиш этди.
Жумладан, “кичик олимпиада” ўйинларида юртимиз ёшларининг нафари мазкур совринларни қўлга киритишда бевосита қатнашган бўлса, уларнинг 42 нафари йигитлар, 35 нафарини спортчи қизлар ташкил этди.
III Осиё ёшлар ўйинларининг энг сермаҳсул спортчилари сифатида эътироф этилган оғир атлетикачиларимиз Маржона Абдумуталова ва Мунисбек Давлетов, енгил атлетикачимиз Шодиёна Раҳмонова иккитадан олтин медалларга эгалик қилди.
Ўзбекистон спорт делегацияси аъзоларидан ёш дзюдочи қизимиз 15 ёшли Дилафрўз Болтабоева энг ёш чемпион номига, Алина Колючева(15) қитъа ўйинларининг энг ёш совриндори номига мушарраф бўлди.
Яна бир эътиборли ўзига хос жиҳат, III Осиё ёшлар ўйинларида миллий спорт туримиз кураш бўйича расмий мусобақалар ташкил этилиб, ўзбекистонлик курашчилар ўйинларнинг 4 та вазнида ҳам ғолибликни тантана қилишга эришди.
Т. Рўзиев, ЎзА