Қашқадарёнинг Шаҳрисабз туманида туғилиб ўсган Акобирхон Шукуров бугун ўзбек илм-фанининг янги авлод етакчиларидан бири сифатида танилмоқда. 2016 йилда магистрлик, 2021 йилда техника фанлари бўйича фалсафа доктори даражасини олган ёш олим, ўз илмий йўлини тўлиқ Ўзбекистон Фанлар Академияси Полимерлар кимёси ва физикаси институтида бошлаб, бугунга қадар ўн йил давомида илмий изланиш олиб келмоқда.

Шукуровнинг изланишлари полимер таркибли дори воситалари яратишга қаратилган. Унинг энг йирик ютуғи — вирусли кўз касалликларини даволаш учун мўлжалланган, биоэрувчан “ГлазАвир” номли ноёб доривор плёнкани яратишдир.

Бу жуда юпқа, лекин кучли таъсирга эга плёнка кўзга қўйилгач, аста-секин эрийди ва дори моддани бевосита касалланган жойга етказади. Натижада даволаш самарадорлиги бир неча баробар ортади. “ГлазАвир” вирусга қарши, яллиғланишни камайтириш ва иммунитетни мустаҳкамлаш хусусиятларига эга.

Олим ва унинг жамоаси яратган бу плёнкалар клиникагача бўлган барча синовлардан муваффақиятли ўтган. Тадқиқотлар шуни кўрсатдики, “ГлазАвир” билан даволанган ҳайвонларда касаллик аломатлари тез йўқолган, кўз тўқималари тез тикланган ва умри анъанавий даволаш усулларига қараганда анча узайган.

Бироқ муаммо шундаки, мамлакатимизда бундай плёнка шаклидаги дори воситаларини ишлаб чиқарувчи фармацевтик корхона ҳозирча йўқ. Шу боис клиник синовларни бошлаш ва кенг кўламда ишлаб чиқариш жараёни вақтинча кечикмоқда.

Шунга қарамай, олимнинг илмий изланишлари 40 дан ортиқ мақолаларда, жумладан халқаро илмий журналларда эълон қилинган. У бугун “Целлюлоза ва унинг ҳосилалари кимёси ва технологияси” лабораториясининг катта илмий ходими сифатида нафақат тадқиқот олиб бормоқда, балки ёш кадрларни тарбиялаб, уларни илмга ошно қилишда ҳам ҳисса қўшиб келмоқда.  

Меҳнатсеварлиги, вазминлиги ва илмга бўлган садоқати билан Акобирхон Шукуров институтнинг энг ҳурматли мутахассисларидан биридир. Унинг “ГлазАвир” ихтироси эса шубҳасиз, нафақат ўзбек, балки жаҳон офталмологияси тарихида ўз ўрнини топиши мумкин бўлган йирик ютуқдир.

Батафсил видеода:

<iframe width="640" height="480" src="https://www.youtube.com/embed/ytfE4Sx7sek?si=LjjYtj3YfpCXlqux" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

М.Эшмирзаева, Д.Ёқубов, У.Тўхтаев, ЎзА