Бугун, 5 июнь ўзбек футболи тарихига олтин ҳарфлар билан битиладиган ўзига хос кун бўлиши остонасида турибмиз.

Ҳаяжонларимиз бир олам. Тахминлар, иқтибослар, фикрлар, майдоннинг ҳар бир чизиғида ҳаракат қиладиган футболчиларимиз тўғрисидаги гап-сўзлар ҳар қачонгидан ҳам бугун одамлар орасида энг кўп муҳокама қилинаётган мавзуга айланган.

Айтиш лозим, Осиё футбол конфедерациясига аъзо мамлакатлар учун 2026 йилги Жаҳон чемпионати саралаши бир неча босқичдан иборат этиб белгиланган. Ҳар бир босқич миллий терма жамоалар учун муҳим синов босқичи ҳисобланади.

Океан ортининг учта мамлакатида 2026 йил ўтадиган Жаҳон чемпионати Осиё қитъаси учун тарихий мундиал саналади. Олдинги чемпионатларда қитъага 4,5 ёки 5,5 та йўлланма ажратилган бўлса, бу сафар 8+1 та форматда Осиё жамоалари мундиал чиптасига эга чиқиши белгиланган.

Осиё қитъасида Жаҳон чемпионатига чиқиш учун 5 босқичли саралаш тизими жорий этилган бўлиб, дастлабки саралаш босқичида ФИФА рейтингида энг қуйи ўринларни эгаллаган 20 та жамоа иштирок этади. Ғолиб бўлган 10 та жамоа кейинги босқичга йўл олиши кўзда тутилган.

Саралашнинг кейинги босқичида 36 та жамоа қатнашади. Ушбу жамоалар 9 та гуруҳга бўлинади. Гуруҳларда ҳар бир жамоа 6 та ўйин ўтказади ва 2 та энг яхши жамоа кейинги босқичга чиқади. Кейинги босқичга етиб келган 18 та жамоа 3 та гуруҳга бўлинади ва жамоалар ўз гуруҳида жами 10 та ўйин ўтказади. Ҳар бир гуруҳдан 2 та энг кучли жамоа бевосита “ЖЧ-2026” йўлланмасини қўлга киритади. Бунда 6 та жамоанинг тўғридан-тўғри мундиалга чиқиши ва ўз гуруҳларида 3 ва 4-ўринни эгаллаган 6 та энг яхши жамоа 4-босқичда курашни давом эттириши назарда тутилган.

Осиё қитъаси 4-босқич баҳслари қўшимча саралаш тизими бўлиб, 6 та жамоа 2 та гуруҳда “ЖЧ-2026”нинг 2 та йўлланмаси учун баҳс юритади. Осиё футбол жамоалари учун “ЖЧ-2026”га чиқишнинг сўнгги юриши қитъалараро плей-офф босқичи саналади. Унда 4-босқичда 2-ўринни эгаллаган 2 та жамоа чемпионатнинг ягона чиптаси учун куч синашади.

2026 йилги Жаҳон чемпионати карвони аллақачон йўлда. Ўзбекистон миллий терма жамоаси Осиё саралашининг учинчи босқичида тарихий йўлланмани қўлга киритиш остонасида турибди.

Саралашнинг ушбу босқичида Ўзбекистон терма жамоаси “А” гуруҳида Эрон, Қатар, БАА, Қирғизистон ва Шимолий Корея жамоалари билан баҳс юритмоқда.

Футбол мухлисларига маълум, шундай вазиятда Эрон терма жамоаси ҳозирча гуруҳ етакчиси сифатида чемпионат йўлланмасини нақд қилди.

Айнан бугун гуруҳда 2-ўринда бораётган Ўзбекистон миллий терма жамоаси қайсидир маънода мундиал йўлланмасини қўлга киритиши мумкин. Лекин рақибимиз БАА ҳам ҳали иккинчи йўлланмадан умидини узмаган.

Ўтган ўйинлар ҳолатига эътибор қаратсак, миллий терма жамоамиз Эрон билан дуранг, БАА ва Шимолий Корея устидан ғалаба, Қатар билан шиддатли баҳсда 2:3 ҳисобидаги аламли мағлубият қайд этган.

Орзуларимизнинг ҳақиқатга айланиши энг аввало, бугун 5 июнь куни БААга қарши меҳмонда ўтказадиган учрашувимизда қайд этиладиган натижага боғлиқ.

Воқеалар ривожидан олдинга ўтиб айтадиган бўлсак, БААдан очко тортиб олинган тақдирда 10 июнь куни Тошкентда Қатарга қарши ўйин футболчиларимиз учун синов ўйини бўлиб қолишини ич-ичимиздан истамоқдамиз.

Айтиш лозимки, БАА ҳар доим хавфли жамоа саналади. Улар катта йўл остонасида барчасини ўзгартиришга интилади. Биз учун эса ғурур, ор, Ватан шаъни учун кечадиган ушбу ўйинда Ўзбекистон миллий терма жамоасининг ғалабаси, футболчиларимиз томонидан киритилиши керак бўлган ҳар бир гол катта аҳамиятга эга.

Истагимиз, бугунгача армонга айланиб келган, қалб-қўримизнинг туб-тубида ўзбек футболининг муваффақиятли кунларини интиқ кутаётган шодлик вулқонлари айнан бугун, Бирлашган Араб Амирликларида, Абу-Дабининг муҳташам футбол майдони узра кенг дунёни қамраб олсин.

Т.Рўзиев

ЎзА