“Ўзатом”: қуруқ совитиш технологиялари бўйича ҳамкорлик кенгаймоқда
“Ўзатом” агентлигида Венгриянинг “MVM EGI Zrt.” давлат компанияси делегацияси билан ишчи учрашув бўлиб ўтди. Унда атом электр станцияси учун қуруқ совитиш тизимларини жорий этиш, ишлаб чиқаришни маҳаллийлаштириш ҳамда икки томонлама ҳамкорликни янада ривожлантириш масалалари муҳокама қилинди.
Музокаралар давомида томонлар қуруқ совитиш технологиялари асосида объектни лойиҳалаштириш, шунингдек, бутловчи қисмларни Ўзбекистон ҳудудида ишлаб чиқариш имкониятларини кўриб чиқди. Таъкидланганидек, бу маҳаллий саноат салоҳиятини ошириш ва миллий ишлаб чиқарувчилар иштирокини кенгайтиришга хизмат қилади. Ўз навбатида, атом электр станцияси майдончасида қуруқ совитиш тизимларини жорий этиш бўйича шартнома музокараларини якуний босқичга олиб чиқиш ҳамда эришилган келишувларни амалиётга татбиқ этиш юзасидан фикр алмашилди.
Учрашувда мазкур технологиялар мамлакатда сув ресурсларини тежаш концепциясига тўлиқ мос келиши, шу билан бирга Ўзбекистоннинг иқлим ва экологик шароитларига мос замонавий технологик ечимларни қўллаш имконини бериши қайд этилди.
Меҳмон томон “Ўзатом” агентлиги билан шаклланган очиқ ва самарали мулоқотни юқори баҳолаб, Ўзбекистон атом энергетикасини барқарор ривожлантиришга қаратилган замонавий технологияларни жорий этиш бўйича ҳамкорликни давом эттиришга тайёр эканини билдирди.
Агентлик ахборот хизматига кўра, “Ўзатом” агентлиги ва “MVM EGI Zrt.” компанияси ўртасидаги ҳамкорлик ўзаро англашув меморандуми асосида амалга оширилмоқда. Унга кўра, қуруқ совитиш технологияларини жорий этиш, ишлаб чиқаришни маҳаллийлаштириш, юқори малакали мутахассислар тайёрлаш ҳамда Ўзбекистоннинг иқлим шароитига мос замонавий технологияларни катта ва кичик қувватли атом электр станциялари учун қўллаш назарда тутилган.
Н.Зиёдуллаева, ЎзА
