От спорти: Ўзбекистон вакиллари тўртта медаль қўлга киритди
Россиянинг Москва шаҳридаги «Maxima Stables» от спорти мажмуасида тўсиқлардан сакраш — конкур бўйича «Mini Masters» сериясининг навбатдаги босқичи ўтказилмоқда.
Мусобақанинг дастлабки баҳсларида Ўзбекистон вакиллари муваффақиятли иштирок этиб, иккита олтин ва иккита кумуш медални қўлга киритди.
Хусусан, Хуршидбек Алимжонов 125 сантиметр баландликдаги йўналишда “Champions League” лақабли оти билан биринчи ўринни эгаллади.
Спортчимиз 115 сантиметр баландликдаги баҳсда “Chaloina” лақабли оти билан яна бир бор шоҳсупанинг юқори поғонасидан жой олди. Шунингдек, “Lavin” лақабли оти билан мазкур баландликдаги йўналишда иккинчи натижани қайд этди. Яна бир вакилимиз Нуржан Туякбоев 105 сантиметр баландликдаги йўналишда “Lord Pepsi” лақабли оти билан иккинчи ўринни эгаллади.
Шу тариқа, Ўзбекистон вакиллари мусобақанинг биринчи кунини иккита олтин ва иккита кумуш медаль билан якунлади.
Жавоҳир Тошхўжаев,
ЎзА
