Ўшда “44-куз” китобининг тақдимоти бўлиб ўтди
Ўш давлат университетида Ўзбекистон Ёзувчилар уюшмаси аъзоси Шуҳрат Орифнинг “44-куз” китоби тақдимоти бўлиб ўтди.
Унда туркиялик, ўзбекистонлик меҳмонлар, давлат ва жамоат арбоблари, адиблар, адабиётшунослар, профессор-ўқитувчилар, талабалар, шеърият мухлислари қатнашди.
Дастлаб меҳмонлар университет биноси олдида тантанали кутиб олинди ва “Дўстлик” кўргазмаси билан танишди.
Тақдимот маросимида Ўш давлат университети ректори Кудайберди Кожобеков, ТУРКСОЙ халқаро ташкилоти бош котиби Султон Раев, Қирғизистон Миллий ёзувчилар уюшмаси раиси маслаҳатчиси Бегижон Аҳмедов, Ўзбекистон Ёзувчилар уюшмаси раиси ўринбосари Ғайрат Мажид, Ўзбекистон халқ шоири Усмон Азим, Ўш давлат университети Филология ва маданиятлараро мулоқот институти профессори Гулина Жамғирчиева, китоб таржимони Гулумхан Исаева сўзга чиқиб, Шуҳрат Ориф ижодининг ўзига хос жиҳатлари ҳақида гапирди.
Шуҳрат Ориф замонавий ўзбек адабиёти ва журналистикасида ўз овозига эга ижодкор ҳисобланади. Унинг ижодидаги асосий ўзига хосликлар шундан иборатки, шоирнинг шеърлари ва лирик қатраларида ҳаётий кузатувлар фалсафий мушоҳадалар билан уйғунлашиб кетади. Унинг шеъриятида дунёни ва инсонни теран англашга интилиш кучли.
Шуҳрат Ориф шеъриятида мумтоз адабиёт анъаналари, хусусан, Румий, Машраб ва Мансур Халлож каби сиймолар тимсоллари орқали ифодаланган илоҳий ишқ ва нафс тарбияси мавзулари тез-тез учрайди.
Унинг лирикаси изтиробли, аммо самимий иқрорлардан иборат. Шеърларида мунгли оҳанглар ва инсон руҳиятининг энг нозик қирралари акс этади.
Шуҳрат Ориф нафақат шоир, балки фаол журналист ва жамоат арбоби сифатида ҳам танилган. У ҳозирда Ўзбекистон Журналистлар уюшмаси раиси вазифасини бажарувчи сифатида соҳадаги ислоҳотлар ва ижодий жараёнларни ривожлантиришда фаол иштирок этмоқда.
“Мен асли одаммас, ёр эдим” китоби унинг илк шеърий тўплами саналади. “Шом товуши” эса фалсафий-лирик қатралар ва ҳаётий кузатувларни жамлаган китоб.
“44-куз” китоби Шуҳрат Орифнинг энг сара шеърлари жамланган тўплам бўлиб, у шоир ижодидаги муҳим босқични ифодалайди. Китоб номидаги "44" рақами шоирнинг маълум бир ёш довонидаги хулосалари, куз фасли эса — ҳаётнинг пишиқчилик, мушоҳада ва бироз мунгли даври рамзидир. Бу ерда куз шунчаки табиат ҳодисаси эмас, балки руҳий покланиш фасли сифатида тасвирланади.
Тўпламдаги шеърларда инсоннинг ўзлигини англаши, Тангрига бўлган ишқи ва дунёнинг ўткинчилиги ҳақидаги теран фикрлар марказий ўрин тутади.
Ушбу китоб нафақат Ўзбекистонда, балки қўшни давлатларда ҳам эътибор топган. Хусусан, қирғиз тилига таржима қилиниб, Бишкекда нашр этилган. Бу Шуҳрат Ориф ижодининг туркий халқлар учун ҳам тушунарли ва яқин эканидан далолат беради. Китобда классик шеърий анъаналар билан замонавий руҳ уйғунлашган. Муаллиф оддий сўзлар билан инсон қалбининг энг мураккаб изтиробларини ифодалаб беради.
Мухтасар айтганда, “44-куз” бу шоирнинг ўз нафси, дунё ва ҳақиқат билан юзма-юз келиши, қалб изтиробларининг бадиий ифодасидир.
Адабий тадбирда Бегижон Аҳмедов Шуҳрат Орифга Қирғизистон Миллий ёзувчилар уюшмасининг аъзолик гувоҳномаси ва белгисини топширди.
Тадбир давомида университет талабаларининг шеърий чиқишлари намойиш этилди, санъаткорларнинг қўшиқлари кечага файз бағишлади.
Н.Усмонова, ЎзА
