Жиззах шаҳрида фаолият кўрсатаётган “Sangzor Dizayn Qurilish” масъулияти чекланган жамияти шахсий ҳисоб варағида 20 миллион сўм айланмадан ортиқча солиқ тўлангани маълум бўлди.

 Мазкур ортиқча маблағ бир кун ичида МЧЖнинг ер солиғига ўтказилиб, мазкур солиқдан бўлган қарздорлик қопланди.

  Вилоятда жорий йилнинг октябрь ойида хўжалик юритувчи субъектлар томонидан ортиқча тўланган солиқларни ҳисобга олиш ёки қайтариш юзасидан 184 та мурожаат келиб тушди.  “Электрон солиқ хизматлари” портали ҳамда юридик шахснинг шахсий кабинети орқали йўлланган бу мурожаатлар натижасида жами 3 миллиард 93 миллион  309 минг сўм ортиқча тўланган маблағлар солиқ тўловчиларнинг бошқа солиқ турларига йўналтирилди.  

Илгари ортиқча ташвиш бўлган бу ишни тадбиркорлик субъектлари  солиқ идорасига бормасдан, “Электрон солиқ хизматлари” сайтида  ишга туширилган  янги тизимдан фойдаланиб  амалга оширди.  

 Маълумки,  жорий йил 1 октябрдан тадбиркорлик субъектларининг солиқлардан мавжуд ортиқча тўлов суммаларини бошқа солиқ туридаги қарзларига сингдириш амалиётининг соддалаштирилган тизими ишга туширилди. Аниқроғи, солиқ тўловчида ортиқча тўлаган солиқ суммасини қисқа вақт ичида бошқа турдаги солиқ қарзларига йўналтириш имкони пайдо бўлди.  

Эски тизимда 8 та босқичдан иборат  ва тўлиқ инсон омили билан боғлиқ бўлган бу амалиётнинг соддалаштирилгани  солиқ тўловчиларга  жуда қўл келмоқда. Илгари солиқ тўловчининг  шахсий кабинети орқали йўллаган мурожаати  рўйхатга олиниб, солиқ идораси раҳбарига киритилар, бошлиқ танишиб,  имзолангач, ғазначиликка юборилар эди.  Тизим ноқулай ва вақт кўп кетар эди.

– Мазкур амалиёт солиқ тўловчиларни қийнаб келган масалалардан бири эди,  – дейди вилоят солиқ бошқармаси матбуот хизматининг раҳбари Муқаддас Сафарова. – Сабаби тадбиркорлик субъекти эгаси ёки ҳисобчиси маълум солиқни тўлашда хатоликка йўл қўйса, кейинчалик уни тўғирлаш учун 10 кунлаб кутишига тўғри келар эди. Энди солиққа ортиқча тўланган маблағни тасарруф этиш солиқ тўловчи иҳтиёрига берилиб, ана шу вақт кескин қисқарди. Солиқ тўловчи интернетдаги шахсий кабинетига кириб, ошиқча тўловни  қарздорлиги бор солиқ турига  ўзи ташлайди, яъни бухгалтерия тилида “переброска”  қилади.  

Автоматик тарзда амалга ошириладиган бу жараёнда инсон омили қатъий чекланган. Солиқ тўловчининг қарори электрон шаклда солиқ органига юборилгач, бу иш кўпи билан бир иш кунида бажарилади.  

Т. БЕКНАЗАРОВ, ЎзА