Ўқ отиш спорти: Хитойда ўтаётган жаҳон кубоги босқичида Ўзбекистон байроғи юксалди

Хитойнинг Ханчжоу шаҳрида ўқ отиш спорти бўйича ўтказилаётган жаҳон кубоги босқичида Ўзбекистон терма жамоаси аъзоси совриндорлар қаторидан жой олди.

58 га яқин мамлакатнинг 680 нафардан зиёд мерганлари ўқ отиш ва стентдан ўқ отиш йўналишлари бўйича жаҳон кубоги босқичида иштирок этмоқда.

Жаҳон кубоги босқичининг 10 метрдан пневматик тўппончадан ўқ отиш баҳсларида ватанимиз шарафини ҳимоя қилган терма жамоамиз аъзоси Владимир Свечников бронза медалини қўлга киритди.

Ўз навбатида, олтин медаль хитойлик Шуаҳианг Буга насиб этган бўлса, кумуш медалга Жанубий Корея вакили Суҳеон Ҳонг эга чиқди.

15 та медаллар жамланмаси учун кечаётган жаҳон кубоги баҳслари 29 июлга қадар давом этади.

Т.Рўзиев,

ЎзА