OpenAI СИ бозорида ҳамон етакчи
Сунъий интеллект индекс ҳисоботига кўра, “Anthropic” илк бор пулли хизматдан фойдаланиш бўйича “ОpenAI”ни ортда қолдирди. АҚШдаги 50 000 дан зиёд компания корпоратив тўлови асосида шакллантирилган мазкур рўйхат СИ хизматига йўналтирилган харажатни яққол акс эттирган.
Апрель ойида “Anthropic” улуши 34,4 фоиз ошган, ОpenAI кўрсаткичи эса 32,3 фоиз пасайган. Таҳлилчилар бу жараёнда “Claude Code” платформаси муҳим роль ўйнаганига эътибор қаратган.
“Аmazon“ ҳам айни йўналишдаги фаолиятини кенгайтирди. Компания харид учун мўлжалланган “Rufus” чат-ботини “Аlexa+” тизимига улади. Эндиликда ушбу дастур фойдаланувчига олдинги хариди, қизиқиши ва суҳбатини эслаб қолган ҳолда маҳсулот тавсия қилади. Маълумотга кўра, “Rufus” бета-версиясининг ўзиёқ 300 миллиондан кўп фойдаланувчини жалб қилган.
CИ ёрдамида контент яратиш йўналишида ҳам янги воситалар пайдо бўлмоқда. “Higgsfield” ва “Claude Code” уйғунлашуви мижозларга бир вақтнинг ўзида бир неча CИ модели орқали тасвир яратиш имконини беряпти. Тизим бир хил промптни турли моделга юбориб, натижани автоматик таққослайди ва энг яхши вариантни танлашга ёрдам беради.
Сунъий онг модели тайёрлашни автоматлаштириш йўналишида эса “Adaption AutoScientist” тизими тақдим этилди. Платформа турли дата сет ва параметрларни мустақил синаб кўриб, моделни автомат равишда мувофиқлаштиради. Ички тестда тизим эксперт қўлда созлаган моделга қараганда ўртача 35 фоиз самарали натижа кўрсатган.
“Nvidia” бозори қиймати 5,5 триллион долларга етган илк компанияга айлангани ҳам жиддий муҳокамага сабаб бўлди. “Microsoft” эса 100 дан ортиқ СИ-агентдан иборат MDASH хавфсизлик тизимини тақдим этди.
Барибир, мутахассислар ҳамон OpenAI истеъмол бозорида энг кучли СИ-брендлардан бири бўлиб қолаётганини таъкидламоқда. Бинобарин, компания шу йилдан бошлаб асосий эътиборни кўпроқ корпоратив мижозларга қаратаётгани сезиляпти.
Саида Абдулазиззода, ЎзА
