Стэнфорд университети олимлари инсон органларининг биологик ёшини аниқлашга мўлжалланган янги авлод қон таҳлилини ишлаб чиқди. Бу инновацион тест ёрдамида ҳар бир аъзонинг қандай тезликда қаришини баҳолаш, шунингдек, келажакдаги соғлиқ билан боғлиқ хавфларни олдиндан аниқлаш мумкин бўлади.

Тадқиқотни бошқарган профессор Тони Висс-Корей ушбу ёндашувни шундай изоҳлади:

“Биз қон асосида аъзоларингизнинг ёшини аниқлай оладиган индикаторларни ишлаб чиқдик. Бу усул ёрдамида бугун организмингиз ҳолатини баҳолаб, келгуси ўн йилликда қандай касалликлар ривожланиши мумкинлигини олдиндан башорат қилишимиз мумкин.”

Таҳлил инсон қонидаги оқсил профилларини таҳлил қилиш орқали юрак, буйрак, ўпка, мушак ва бошқа органларнинг биологик ёшини хронологик ёш билан солиштириб аниқлайди. Тадқиқот натижалари шуни кўрсатдики, ҳар бир орган турли тезликда қариши мумкин, аммо инсон умрининг давомийлигида энг муҳим омил — мия ёши ҳисобланади.

17 йил давом этган тадқиқотда 44 мингдан ортиқ 40–70 ёшдаги кўнгиллилар иштирок этди. Унга кўра, ёш кўринишга эга мия инсоннинг умрини узайтириши ва ўлим хавфини камайтириши мумкин. Аксинча, “қари” мия ўлим хавфини икки баравардан ортиқ оширади ва Альцгеймер касаллигига чалиниш эҳтимолини 12 бараварга кўпайтиради.

“Мия — узоқ умр кўришнинг дарвозабонидир. Агар миянгиз ёш бўлса, эҳтимол, сиз узоқ яшайсиз. Агар у қари бўлса, бу хавфли.” - Висс-Корей

Янги қон тести келажакда шифокорларга фақат касалликларни даволаш эмас, балки уларни олдиндан аниқлаш ва профилактика қилиш имконини беради. Бу ёндашув тиббиётда шахсийлаштирилган ёндашув сари муҳим қадам бўлиши мумкин.

<iframe width="650" height="420" src="https://www.youtube.com/embed/avXgqsSTy3M" title="Olimlar organlarning biologik yoshini aniqlovchi qon tahlilini yaratdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Анвархўжа Аҳмедов, ЎзА